Aqtóbede polısıa departamenti ǵımaratynyń aldyna ulttyq kıim dúkenine qatysty alaıaqtyq isi boıynsha zardap shekkender jınaldy. Olar tergeýdiń barysyna narazylyq bildirýde, dep habarlaıdy infohub.kz saıty.
Zardap shekkenderdiń biri Ásel Dýısova bylaı dedi: «Olardyń jarnamasynda bes jyldan astam ýaqyt jumys istep kele jatqany, dıvıdend tóleıtini aıtylǵan. Aıtalyq, sen aqsha salasyń, saǵan 20 paıyzdan joǵary dıvıdend beredi. Maǵan olardyń áshekeıleri, óndirisi, ulttyq stıldegi buıymdary qyzyqty boldy. Men paıyzǵa obraz alý úshin aqsha saldym».
Advokat Nurbolat Qamysbaı sqemaǵa keminde tórt adam qatysqanyn málimdedi. «Bireýine qatysty úıqamaq túrindegi bultartpaý sharasy qoldanyldy. Qalǵandary is boıynsha kýáger retinde ótýde. Al tórteýiniń de róli aıqyndalǵan. Árqaısysynyń óz róli bar. Bul uıymdy bir adam basqarǵan. Olar paıda taýyp otyrǵan, ıaǵnı toptyń turaqtylyǵy bolǵan», — dep túsindirdi ol.
Ulttyq stıldegi kıim men áshekeıler satatyn dúken aqtóbelikterdiń aqshasyn tartqan. Satyp alýshylarǵa brendtiń ınvestory bolýdy usynyp, 20 paıyz jáne odan joǵary tabys ýáde etken. Tólemder aı saıyn júrgizilýi kerek edi, al bonýs retinde assortımentten kez kelgen taýardy tańdaýǵa bolatyn. Alaıda kóp uzamaı tólemder toqtaǵan.
Polısıa málimetinshe, zardap shekkender retinde 68 adam tanylǵan. Jalpy shyǵyn aldyn ala esepteý boıynsha 100 mln teńgege jýyq. Quqyq qorǵaý organdary kináliler jazalanatynyn sendirýde. Aqtóbe oblysy PD bastyǵynyń orynbasary Áset Qalıev: «Qajetti tergeý áreketteri júrgizildi. Atalǵan dúkenniń negizin qalaýshyǵa qatysty sot bultartpaý sharasyn qoldandy. Sondaı-aq qylmystyq is boıynsha bes adam kúdikti dep tanyldy, onyń ishinde dúken negizin qalaýshynyń týysy men qurbysy da bar», — dep habarlady.
Buǵan deıin Aqtóbe qalalyq polısıa basqarmasy ulttyq brendti damytýǵa ınvestısıa tartýǵa baılanysty alaıaqtyq faktisi boıynsha qylmystyq is tergelip jatqany habarlanǵan bolatyn. 2024 jyldyń basynan bastap aımaq turǵyndaryna Instagram arqyly ulttyq stıldegi kıim men aksesýarlar satatyn dúkenniń qyzmeti týraly aıtylǵan. Dúkenniń paraqshasynda joǵary tabys ýáde etip, ınvestısıa salý múmkindigi týraly aqparat ornalastyrylǵan. Sol kezde 8 zardap shekken bolǵan, shyǵyn kólemi 72 mln teńgeden astamdy quraǵan.