Qazaqstanda medısınalyq preparattardy saqtaý men jetkizýdi endi elektronıka baqylaıdy. Vaksınalardyń temperatýralyq rejımniń buzylýynan búlinbeýin qamtamasyz etý úshin kóliktegi 21 myńnan astam dachık pen treker jumys isteıdi. Bul týraly infohub.kz saıty habarlaıdy.
Densaýlyq saqtaý mınıstrliginiń málimetinshe, respýblıkada vaksınalardyń «sýyq tizbegin» baqylaýdyń sıfrlyq júıesi keńeıtilýde. Endi saqtaý temperatýrasy GPS-monıtorıng arqyly avtomatty túrde baqylanady.
Eldiń bas sanıtarlyq dárigeri Sarhat Beısenovanyń aıtýynsha, júıe Qazaqstan boıynsha myńnan astam nysandy qamtıdy. Jumys barlyq kezeńde – saqtaýdan bastap qoımalar men medısınalyq uıymdarǵa jetkizýge deıin júzege asyrylady.
«Tońazytqysh jabdyqtardan alynǵan derekter avtomatty túrde biryńǵaı sıfrlyq platformaǵa túsedi. Vaksınalardy tasymaldaý kezinde arnaıy kólikterge GPS-monıtorıng jumys isteıdi», – delingen habarlamada.
Normadan nemese belgilengen parametrlerden kez kelgen aýytqý kezinde problemanyń qaı kezeńde týyndaǵanyn tez anyqtap, qajetti sharalardy jedel qabyldaýǵa bolatyny atap ótildi.
Jalpy, mınıstrlik 3,5 myńnan astam nysandy qamtı otyryp, 21 myńnan astam monıtorıń núktesin qurýdy josparlap otyr. Sonymen qatar, respýblıkanyń barlyq óńirinde 800 arnaıy kólik birligine baqylaý jasalatyn bolady.
Sondaı-aq vaksına saqtaýǵa arnalǵan jabdyqtar jańartylýda. Eldiń medısınalyq uıymdary úshin jańa tońazytqysh kameralar, muzdatqyshtar jáne 900-den astam tońazytqysh satyp alý josparlanýda.
Buǵan deıin «Kýrsıv» Densaýlyq saqtaý mınıstrligi QR-daǵy medısınalyq qyzmetti lısenzıalaý talaptaryn kúsheıtkenin jazǵan bolatyn. Endi memlekettik jáne jeke klınıkalar medısınalyq sıfrlyq júıe (MSJ) bolǵan jaǵdaıda ǵana jumys isteı alady.