Resmı jumystyń bolmaýy ata-anany balalaryn asyraý mindetinen bosatpaıdy. Bul týraly óńirlik komýnıkasıalar qyzmetinde ótken brıfıńte sot oryndaýshysy Dáýren Onlasyn jumyssyz qazaqstandyqtar alıment tólemeýge quqyly ma degen suraqqa jaýap berip, málimdedi, dep habarlaıdy infohub.kz saıty.
Spıkerdiń aıtýynsha, resmı jumystyń bolmaýy Qazaqstanda alıment mindettemelerin toqtatpaıdy. Ol Qazaqstan Respýblıkasynyń «Atqarýshylyq is júrgizý jáne sot oryndaýshylarynyń mártebesi týraly» zańyna silteme jasady: tabys bolmaǵan jaǵdaıda bereshek Qazaqstan Respýblıkasyndaǵy ortasha jalaqyny eskere otyryp esepteledi.
«Sondyqtan boryshkerdiń: „Men resmı túrde esh jerde jumys istemeımin, sondyqtan alıment tóleýge mindetti emespin“ degen ustanymy zańdy túrde negizsiz», — dedi Dáýren Onlasyn.
Ol sondaı-aq alıment óndirý týraly sot aktisin oryndamaǵany úshin qandaı jaýapkershilik týyndaıtynyn túsindirdi. Eger qylmystyq quqyq buzýshylyq belgileri bolmasa, boryshker Qazaqstan Respýblıkasynyń Ákimshilik quqyq buzýshylyq týraly kodeksiniń 669-baby boıynsha ákimshilik jaýapkershilikke tartylýy múmkin.
Alımentti uzaq ýaqyt tólemegen jaǵdaıda Qazaqstan Respýblıkasynyń Qylmystyq kodeksiniń 139-baby boıynsha qylmystyq jaýapkershilik týyndaıdy. Eger ata-ana alımentti úsh aıdan astam tólemese, oǵan 600 saǵatqa deıin qoǵamdyq jumys taǵaıyndalýy, bostandyǵy shektelýi nemese 2 jylǵa deıin bas bostandyǵynan aıyrylýy múmkin. Sonymen qatar, Qazaqstan Respýblıkasynyń Qylmystyq kodeksiniń 430-baby qoldanylýy múmkin, dep qorytyndylady Dáýren Onlasyn.
Buǵan deıin Qazaqstanda 25 tamyzdan bastap alıment tóleý tártibi ózgeretini habarlanǵan. Mamandar elimizdiń turǵyndary mindetti túrde bilýi kerek nárselerdi eske salyp, túsindirdi.