Qazaqstanda Elektrondyq eńbek bırjasynda 105 907 ózekti bos jumys orny tirkelgen. Eńbek jáne halyqty áleýmettik qorǵaý mınıstrligi eń joǵary jalaqy usynylatyn mamandardy atady, dep habarlaıdy infohub.kz saıty.
Vedomstvonyń resmı saıtynda jarıalanǵan málimetterge sáıkes, tamyz aıynda Enbek.kz platformasynda jumys berýshiler 131,6 myń bos jumys ornyn ornalastyrǵan, bul shildemen salystyrǵanda 25,8%-ǵa artyq. Sonymen qatar, jumys izdeýshiler belsendilik tanytyp, ornalastyrylǵan túıindemeler sany 145,2 myńǵa jetip, aldyńǵy aımen salystyrǵanda 2,8%-ǵa ósken.
Mınıstrlikte tamyzdaǵy bos jumys oryndarynyń eń kóp sany bilim berý salasyna tıesili ekenin atap ótti — 61 myń usynys. Bul oqý jylynyń bastalýyna deıin kadrlarǵa degen qajettiliktiń qalyptasýymen túsindiriledi. Sondaı-aq, basqa da qyzmet túrlerin kórsetý, densaýlyq saqtaý jáne áleýmettik qyzmet kórsetý, óńdeý ónerkásibi, aýyl, orman jáne balyq sharýashylyǵy, sondaı-aq qurylys salalarynda da aıtarlyqtaı kóp bos jumys orny ornalastyrylǵan.
Jumys izdeýshilerdiń jas qurylymynda 35 jasqa deıingi azamattar basym. 35–44 jas aralyǵyndaǵy túıindemelerdiń úlesi 25,8%, 45–54 jas — 14,6%, 55 jastan joǵary — 6,7% qurady. Genderlik turǵydan áıelder 60,6% túıindeme ornalastyrsa, erler — 39,4%.
Tamyzda Enbek.kz-te jalaqysy 1 mln teńgeden asatyn bos jumys oryndary usynyldy. Olardyń ishinde — taý-ken ónerkásibindegi aýysym bastyǵy shamamen 2,06 mln teńge jalaqymen, kıberqaýipsizdik mamany — shamamen 2 mln teńge, kenish dırektory — shamamen 1,63 mln teńge. Jumys izdeýshilerdiń eń joǵary jalaqy úmitteri ákimshilik bólim bastyqtarynda — shamamen 2,02 mln teńge, jańa ónimderdi ázirleý jobalarynyń jetekshilerinde — shamamen 1,84 mln teńge jáne satý sheberlerinde — shamamen 1,75 mln teńge bolyp tirkelgen.
Biliktilik deńgeıi boıynsha tamyzdaǵy bos jumys oryndary kelesideı bólindi: 46,6% joǵary bilikti mamandarǵa, 33,1% orta deńgeıge jáne 20,3% tómen biliktilikke arnalǵan. Ornalastyrylǵan túıindemelerdiń 46,5% joǵary deńgeıdegi mamandarǵa, 35,5% orta jáne 18% tómen biliktilikke tıesili boldy.