Jambyl oblysynyń Shý aýdandyq soty 1991 jyldan beri ózi paıdalanyp kelgen turǵyn úı men jer ýchaskesine menshik quqyǵyn taný týraly er adamnyń talabyn qanaǵattandyrmady. Sebebi bul múlik oǵan eńbek qyzmetine baılanysty qyzmettik turǵyn úı retinde berilgen, dep habarlaıdy infohub.kz saıty.
Jambyl oblysy sottarynyń resmı Telegram-arnasynda jazylǵandaı, aýdandyq sot er adamnyń aýdan ákimine qarsy úı men jer ýchaskesine júre paıda bolǵan menshik quqyǵyn (prıobretatelnaıa davnost taný týraly azamattyq isin qarady.
Talap qoıýshy daýly úıde 1991 jyldan beri turyp, uzaq ýaqyt boıy ashyq jáne úzdiksiz paıdalanǵanyn negizge alyp, ózine menshik quqyǵyn tanýdy suraǵan.
Alaıda sot úıdiń talap qoıýshyǵa uıymdaǵy eńbek qyzmetine baılanysty qyzmettik turǵyn úı retinde berilgenin anyqtady. Mundaı úıde kóp jyl turýdyń ózi múlikti óziniń jeke menshigindeı ıelený degendi bildirmeıdi.
Sonymen qatar sot úıdiń uıym múlkine jatatynyn, al uıymnyń sharýashylyq júrgizý quqyǵy toqtatylmaǵanyn jáne joǵalmaǵanyn anyqtady. Bul quqyqtyń memlekettik tirkelmeýi de onyń toqtatylǵanyn kórsetpeıdi.
Qazirgi tańda uıym kúzetshi úıleri men olarǵa qyzmet kórsetýge arnalǵan jer ýchaskelerine quqyq belgileıtin qujattardy resimdeý jumystaryn júrgizip jatyr.
Sot júre paıda bolǵan menshik quqyǵyn alý úshin múlikti óziniń jeke menshigindeı ıelený qajet ekenin atap ótti. Bul jaǵdaıda talap qoıýshynyń turýy eńbek qatynastarymen jáne qyzmettik turǵyn úı berilýimen baılanysty bolǵan.
Sot sheshimimen turǵyn úı men jer ýchaskesine menshik quqyǵyn taný týraly talap qoıýdy qanaǵattandyrýdan bas tartyldy. Sheshim zańdy kúshine engen joq.