Jetisý oblysynyń turǵyndary sotqa júginbeı-aq, Vetnamǵa bolmaǵan sapary úshin 100 myń teńgeni qaıtaryp aldy, dep habarlaıdy infohub.kz.
QR Saýda jáne ıntegrasıa mınıstrliginiń Tutynýshylar quqyǵyn qorǵaý komıtetiniń málimetinshe, áıelder Vetnamda demalyp qaıtpaq bolǵan, alaıda ushýǵa az ýaqyt qalǵanda týroperator týr sharttaryn ózgertken.
Bastapqyda týrıser Danang pen Hoıanǵa 449 myń teńgege barýǵa kelisken. Árqaısysy brondaý úshin 50 myń teńgeden aldyn ala tólem jasaǵan, barlyǵy 100 myń teńge. Aqsha kompanıa ókiliniń shotyna aýdarylǵan, bul tólem qujattarymen rastalady.
Alaıda aldyn ala tólem jasalǵannan keıin sharttar ózgergen: eki qalanyń ornyna tórt qalany qamtıtyn baǵyt usynylyp, quny 700–800 myń teńgege deıin ósken. Áıelder jańa sharttarǵa kelispegen, sebebi olar bastapqy nusqaǵa sengen.
Sonymen qatar, ushý kúnine (2026 jylǵy 19 tamyz) deıin olarǵa avıabılet satyp alynǵany nemese brondaý jasalǵany týraly rastaý usynylmaǵan. Kompanıa ókili suraqtarǵa bıletter keıinirek satyp alynatynyn aıtqan.
Sharttardyń ózgerýine jáne rastaýdyń bolmaýyna baılanysty týrıser sapardan bas tartyp, aldyn ala tólemdi qaıtarýdy talap etken. Máseleni óz betinshe sheshe almaǵan soń, olardyń biri Jetisý oblysy boıynsha Saýda jáne tutynýshylar quqyǵyn qorǵaý departamentine júgingen.
Ótinishke tólem qujattary, kompanıa ókilimen hat almasý jáne bastapqy sharttar men olardyń ózgergenin rastaıtyn basqa da materıaldar qosa berilgen.
Mamandar jaǵdaıdy zerdelep, máseleni sheshýge kómektesken. Nátıjesinde tutynýshy men onyń serigine sotsyz-aq tolyq soma — 100 myń teńge qaıtarylǵan.