Jetisý oblysynyń turǵyny oblystyq mańyzy bar avtomobıl jolynyń jaı-kúıine shaǵymdanyp, beıneúndeý jarıalady. Kadrlarda kóptegen jaryqtar men tereń jol oıyqtary kórinedi, bul jergilikti turǵyndardyń narazylyǵyn týdyrdy, dep habarlaıdy infohub.kz saıty.
Beıne «Prezıdentke hattar» Telegram-arnasynda jarıalandy. Rolık avtory bir kezderi joldyń múldem tegis bolǵanyn, endi onyń maıysyp, «kóterilip ketkenin» aıtady. Shuńqyrlardyń tereńdigi shamamen 15 santımetrge jetedi, al zaqymdalǵan ýchaskeniń uzyndyǵy shamamen 1-2 shaqyrymdy quraıdy.
Turǵynnyń pikirinshe, jol tóseminiń buzylýyna osy baǵytta únemi júretin shamadan tys júktelgen júk kólikteri sebep bolýy múmkin.
Oblys ákiminiń komýnıkasıalar jónindegi keńesshisi Madı Shakenov NUR.KZ tilshisine bergen túsiniktemesinde Taldyqorǵan – Úshtóbe – Byjy – Muqyry avtomobıl joly týraly aıtylǵanyn túsindirdi. Ol merdiger uıymnyń kepildik mindettemeleri aıasynda anyqtalǵan aqaýlar joıylyp, jol tósemi qalpyna keltiriletinine sendirdi.
«Tıisti jumystar aǵymdaǵy jyldyń qazan aıynyń ortasyna deıin belgilengen talaptar men kepildik merziminiń sharttaryna sáıkes oryndalatyn bolady», — dep atap ótti Shakenov.
Ol sondaı-aq jaǵdaı baqylaýda ekenin jáne jumystar aıaqtalǵannan keıin jol tóseminiń tıisti kúıi qamtamasyz etiletinin qosty.