Qazaqstanda jumysqa qabyldaýdyń jańa erejeleri kúshine endi: endi jumys berýshiler jekelegen sanattaǵy úmitkerlerge jumysqa qabyldamaý sebepterin túsindirýge mindetti. Bul týraly infohub.kz saıty habarlaıdy.
Tamyz aıynan bastap qoldanysqa engen Eńbek kodeksindegi ózgeristerge sáıkes, bas tartý alǵan úmitkerler sheshimniń jazbasha negizdemesin talap etýge quqyly. Atap ótilgendeı, jumysqa qabyldamaý jumys berýshi tarapynan zań buzýshylyqty bildirmeıdi, alaıda jekelegen sanattaǵy kandıdattar úshin qosymsha kepildik paıda boldy — bas tartýdyń shynaıy sebebin bilý múmkindigi.
Jazbasha bas tartýdy talap etý quqyǵyna júkti áıelder, úsh jasqa deıingi balalary bar ata-analar, kámeletke tolmaǵandar jáne densaýlyǵynda ereksheligi bar úmitkerler ıe boldy. Zańger Sergeı Ýtkın túsindirdi: «Eger adamǵa eshqandaı sebep aıtylmaı, osy tórt sanatqa jatatyny úshin jumysqa qabyldaýdan bas tartylsa, ol bas tartý sebebin jazbasha túrde habarlaýdy talap ete alady. Al eger bul sebep onyń balasynyń bolýy, júktiligi, kámeletke tolmaǵandyǵy nemese múgedektigi bolsa, onda muny sotta daýlaýǵa bolady».
Eńbek jáne halyqty áleýmettik qorǵaý mınıstrligi jumys berýshiniń ýáji mańyzdy ekenin atap ótti. Eger bas tartý laýazymǵa, tájirıbege jáne biliktilikke qoıylatyn obektıvti talaptarǵa baılanysty bolsa, ol negizdi dep tanylýy múmkin. Alaıda kandıdattyń jeke jaǵdaılary kemsitýge sebep bolmaýy tıis. QR EHÁQM eńbek jáne áleýmettik áriptestik departamentiniń dırektory Erbolat Abylhatın málimdedi: «Jumys berýshi jazbasha bas tartýdy nanymdy dáleldermen ǵana bere alady. Eger qyzmetker biliktilik talaptaryna saı kelse, densaýlyǵy jaramdy bolsa, jumysqa qabyldaýda shekteý men kemsitý bolmaýy kerek».
Qazaqstandyq rekrýterler bolsa, jańashyldyqtar jumys berýshi men kandıdat arasyndaǵy qarym-qatynasqa vakansıa izdeý kezeńinde-aq áser etýi múmkin dep esepteıdi. Marketıń jáne PR menedjeri Muhamed Baǵdatuly atap ótti: «Menińshe, bul jumys berýshilerge de, úmitkerlerge de oń áser etedi, óıtkeni jumys berýshi ashyq bolyp, bas tartýdyń naqty sebepterin aıtqanda, bul úmitker úshin paıdaly. Ol ári qaraı ózine tolyq saı keletin pozısıalarǵa ǵana ótinish beredi. Jalpy, qazir eńbek naryǵy ashyq bola túsýde».