Qaraǵandy oblysynda sot júrgizýshini qarsy jolaqqa shyqqany úshin ákimshilik jaýapkershilikten bosatyp, onyń múgedek anasyna kútim jasaýyn eskerdi, dep habarlaıdy infohub.kz saıty.
Qaraǵandy oblysy sottarynyń resmı Telegram-arnasynda habarlanǵandaı, Býhar-Jyraý aýdandyq soty Ákimshilik quqyq buzýshylyq týraly kodekstiń 596-babynyń 3-bóliginde (qarsy jolaqqa shyǵý) kózdelgen ákimshilik quqyq buzýshylyq týraly isti qarady.
Sot anyqtaǵandaı, 2026 jylǵy 4 mamyrda er adam «VAZ-21110» kóligin basqaryp, Qaraǵandy — Aıagóz — Buǵaz — Tarbaǵataı tas jolynyń 42-shaqyrymynda «Basyp ozýǵa tyıym salynady» belgisimen belgilengen ýchaskede basyp ozyp, qarsy baǵyttaǵy qozǵalysqa arnalǵan jolaqqa shyqqan.
Júrgizýshiniń kinási onyń moıyndaýymen jáne istiń ózge de materıaldarymen dáleldendi. ÁQBtK-niń 596-babynyń 3-bóliginiń sanksıasy kólik quralyn basqarý quqyǵynan alty aı merzimge aıyrýdy kózdeıdi.
Sonymen qatar, ÁQBtK-niń 64-1-babyna sáıkes, jasalǵan ákimshilik quqyq buzýshylyqtyń eleýsizdigi kezinde sýdıa adamdy ákimshilik jaýapkershilikten bosatyp, aýyzsha eskertýmen shektelýi múmkin.
Qalyptasqan jaǵdaıdy, atap aıtqanda, júrgizýshiniń birinshi toptaǵy múgedek anasyna tolyq kútim jasaýyn, sondaı-aq kólik quralynyń jalǵyz tabys kózi ekenin jáne onymen anasyn emdeýge aparatynyn, onyń materıaldyq jaǵdaıyn, quqyq buzýshylyqtyń sıpaty men mán-jaılaryn eskere otyryp, sot jasalǵan quqyq buzýshylyqty eleýsiz dep tanyp, ony ákimshilik jaýapkershilikten bosatyp, aýyzsha eskertýmen shekteldi.
İs boıynsha is júrgizý ÁQBtK-niń 742-baby negizinde toqtatyldy. Sot qaýlysy zańdy kúshine endi.