Batys Qazaqstan oblysynyń Krýgloozernoe aýylynda jol-kólik oqıǵasy boldy. Lada Priora kóliginiń júrgizýshisi eki áıeldi qaǵyp, olardyń biri alǵan jaraqatynan qaıtys boldy, dep habarlaıdy infohub.kz.
«Moı gorod» basylymynyń málimetinshe, oqıǵa Krýgloozernoe aýylynda bolǵan. Lada Priora tizgindegen júrgizýshi eki jaıaý júrginshini qaǵyp, oqıǵa ornynan qashyp ketken. Zardap shekkenderdiń biri oqıǵa ornynda qaıtys boldy, ekinshisi aýrýhanaǵa jetkizildi.
Batys Qazaqstan oblysy polısıa departamentiniń habarlaýynsha, júrgizýshi ustalyp, qamaýǵa alynǵan. Júrgizilgen saraptama onyń apat kezinde mas kúıinde bolǵanyn kórsetken. JKO faktisi boıynsha qylmystyq is qozǵalyp, tergeý amaldary júrgizilýde.
«Tergeý BQO PD basshylyǵynyń baqylaýynda. Ózge aqparat QR QPK-niń 201-babyna sáıkes jarıa etilmeıdi», — dep málimdedi polısıada.
Messendjerlerde JKO-da ana men qyz zardap shekkeni týraly aqparat taralýda. Bul aqparattyń resmı rastaýy ázirge joq.