Batys Qazaqstan oblysynda sot aýdandyq aýrýhanany toǵyz aıǵa jýyq ýaqyt boıy qaterli isikke dıagnoz qoıylmaǵan er adamnyń otbasyna ótemaqy tóleýge mindettedi. Medısınalyq kómek kórsetý kezinde óreskel buzýshylyqtar jiberilgeni anyqtaldy, dep habarlaıdy infohub.kz.
İs materıaldary boıynsha, 2023 jylǵy jeltoqsanda Báıterek aýdanynyń turǵyny Darınskoe kentindegi №2 aýrýhananyń jalpy praktıka dárigerine jıi qusý jáne qara nájis — asqazan-ishek joldarynyń aýyr aýrýlaryn kórsetýi múmkin belgilerge shaǵymdanǵan.
Osyǵan qaramastan, emdeý toǵyz aıǵa jýyq ýaqytqa sozyldy. Osy ýaqyt ishinde pasıent ýaqtyly dıagnostıkadan ótpedi, al 2024 jylǵy 15 tamyzda qaterli isik aýrýynan qaıtys boldy.
Er adam qaıtys bolǵannan keıin onyń jubaıy men balasy aýdandyq aýrýhanaǵa talap-aryz berip, árqaısysyna 10 mıllıon teńgeden moraldyq zıan úshin ótemaqy óndirýdi talap etti.
Medısınalyq mekemeniń ókilderi men emdeýshi dáriger talapty moıyndamady. Olar pasıentke FGDS, zerthanalyq zertteýler men skrınıngten ótý usynylǵanyn, al taldaý nátıjeleri olardyń pikirinshe, synı jaǵdaıdy kórsetpegenin málimdedi. Sondaı-aq dárigerler aýrýdyń jasyryn ótkenin jáne qolaısyz boljamy bolǵanyn, sondyqtan olardyń áreketteri men pasıenttiń ólimi arasynda sebep-saldar baılanysy joq ekenin aıtty.
Alaıda sot tekserý materıaldaryn zerdelep, kerisinshe qorytyndyǵa keldi. Dáriger zerthanalyq zertteý nátıjelerine tıisti baǵa bermegen, Qazaqstan Densaýlyq saqtaý mınıstrliginiń klınıkalyq hattamalaryn saqtamaǵan, sondaı-aq pasıentti gastroenterolog, ınfeksıonıst, gepatolog, hırýrg, travmatolog jáne onkolog sıaqty beıindi mamandarǵa ýaqtyly joldamaǵany anyqtaldy. Sonymen qatar, patogıstologıalyq qorytyndy alǵannan keıin de onkologqa joldama keshiktirilip resimdelgen.
Sotta medısınalyq kómek kórsetý kezinde jiberilgen buzýshylyqtardyń dál osy qaterli isik aýrýynyń kesh anyqtalýyna ákelgeni atap ótildi.
«QR Azamattyq kodeksiniń 921-babyna sáıkes, qyzmetkerdiń eńbek mindetterin oryndaý kezinde keltirilgen zıan úshin jumys berýshi jaýapty bolady. Osy sebepten qarjylyq jaýapkershilik memlekettik komýnaldyq kásiporynǵa júkteldi», — dep habarlady ZQO soty.
Nátıjesinde sot talapty ishinara qanaǵattandyrdy. «Báıterek aýdany №2 aýrýhanasy» SHJQ MKK marqumnyń jubaıy men balasyna moraldyq zıan úshin 700 myń teńgeden ótemaqy tóleýge mindetteldi.
Sot sheshimi ázirge zańdy kúshine engen joq jáne oǵan shaǵym jasalýy múmkin.