InfoHub Logo

Астана әуежайында қамалып қалған шешен азаматына адвокаттар көмекке келді

Шешенстандық Зелимхан Муртазовқа заң көмегін көрсету үшін адвокаттар Рена Керимова мен Елена Жигаленок Астана әуежайына аттанды. Бұл туралы Infohub.kz ақпарат агенттігі хабарлайды.

Адвокат Рена Керимова әлеуметтік желідегі парақшасында: «Біз Елена Жигаленокпен бірге Астана қаласының әуежайының халықаралық терминалының транзиттік аймағында белгісіз себептермен 36 күн бойы тұрып қалған Муртазов Зелимхан Мухмат-Аминовичке заңгерлік көмек көрсету үшін ұшып барамыз», – деп жазды.

Ол сондай-ақ уәкілетті органдардан «Зелимханмен құпия кездесуді қоса алғанда, заңгерлік көмек көрсетуге кедергі жасамауды» сұрады.

Не болды?

@zelim_terminal_astana аккаунтындағы ақпаратқа сәйкес, Зелимхан Муртазаев Украинадағы соғысқа мәжбүрлеп қатысудан құтылу үшін Қазақстанға келген. Ол саяси баспана сұраған, бірақ қазіргі уақытта Ресейге депортациялану қаупімен Астана әуежайында ұсталуда.

Фотосурет Instagram/@zelim_terminal_astana парақшасынан алынды.