InfoHub Logo

Қонақүй мен ойын-сауық кешенін, соның ішінде хайуанаттар бағын салу үшін Конаев әкімдігі бұрын берген 150 мың гектар жер мемлекетке қайтарылды. Жер ресурстарын басқару департаментінің тексеруі нәтижесінде, шенеуніктер жер заңнамасын бұзып, қаланың бас жоспарына қайшы келетін учаскені бөлгені анықталды.

Бұл туралы Infohub.kz ақпарат агенттігі хабарлайды.

Алматы облыстық Жер ресурстарын басқару департаменті Конаев қаласы әкімдігінің қызметіне жоспардан тыс тексеру жүргізді. Тексеруге жер учаскесінің заңдылығына қатысты сұрақтар себеп болды.

Заңсыздық анықталды

Тексеру барысында 150 мың гектар жердің тұрғын үй және ойын-сауық кешені, сондай-ақ хайуанаттар бағын салу үшін берілгені белгілі болды. Алайда, шенеуніктер Жер кодексінің талаптарын бұзған. Учаске бөлу қаланың бас жоспарына сәйкес келмеген.

Әкімдік талапты орындамады

Департамент әкімдікке заңбұзушылықтарды жою туралы нұсқама бергенімен, билік оны орындамады. Осыдан кейін прокуратура Конаев қалалық сотына жүгінді. Сот процесіне Жер ресурстарын басқару департаментінің өкілдері үшінші тарап ретінде қатысып, анықталған заңбұзушылықтар туралы түсініктеме берді.

Сот шешімі

Сот прокуратураның талаптарын толық қолдады. Нәтижесінде, коммерциялық мақсаттағы жер учаскесі мемлекет меншігіне қайтарылды.

Бұған дейін Алматы облысының сәулет және қала құрылысын басқару басқармасы жаңа бас жоспарды әзірлеуге шамамен 4,9 млрд теңге жұмсағаны туралы жазған болатынбыз.