InfoHub Logo

17 наурыздан бастап «Нұрлы Жол» – Семей бағытындағы пойыз жаңа, заманауи вагондармен қатынайды. Бұған дейін бұл бағытта 1993 жылғы үлгідегі ескі вагондар қолданылған болатын.

Бұл туралы Infohub.kz ақпарат агенттігі хабарлайды.

Жаңа вагондардың ерекшеліктері

Жаңартылған пойыз құрамында тоғыз вагон бар: үшеуі купе, бесеуі плацкарт және біреуі штабтық вагон. Бұл вагондар бір бағытта 350-ден астам жолаушыны тасымалдауға арналған.

Әр купеде ыңғайлы жатын орындары, жеке жарықдиодты шамдар, USB порттары және желілік розеткалар орнатылған. Мүмкіндігі шектеулі жандарға арналған арнайы купелер мен арбаларға арналған орындар қарастырылған. Сондай-ақ, жолсерікті шақыру батырмасы да бар.

Вагондардың қызмет ету мерзімі – 40 жылға дейін.

Жолаушыларға арналған жайлылық

«RWS Wagon» үлгісіндегі вагондардың техникалық сипаттамалары барлық санаттағы жолаушыларға – мүмкіндігі шектеулі азаматтарға, балалы отбасыларға, қарт адамдарға және халықаралық туристерге ыңғайлылық пен қауіпсіздікті қамтамасыз етеді.

Вагондардың ішкі жабындары экологиялық, гипоаллергенді материалдардан жасалған. Ауаны залалсыздандыру жүйесі инфекция қаупін азайтады. Штабтық вагонда мүмкіндігі шектеулі азаматтарға арналған кеңейтілген орын және санитарлық торабы бар арнайы купелер жабдықталған.

Жаңа вагондардың қолданысқа енгізілуі

Соңғы екі жылда «Жолаушылар тасымалы» АҚ 219 «RWS Wagon» вагонын сатып алды. Олар Ақтөбе – Атырау, Павлодар – Түркістан, Павлодар – Алматы, Қызылорда – Семей, Алматы – Саратов, Алматы – Өскемен, Астана – Көкшетау, Астана – Бурабай курорты, Қарағанды – Астана бағыттарында қолданысқа берілді.