InfoHub Logo

Блогерлер Ерболат Жанабылов пен Эльмира Төлегенованың ісі бойынша сот процесі мәресіне жетіп келеді. Жұма күні, 24 сәуірде, Эльмира Төлегенова сотта соңғы сөз сөйледі.

Бұл туралы Infohub.kz ақпарат агенттігі хабарлайды.

Өз сөзінде Эльмира Төлегенова соттан өзіне және жұбайына бас бостандығынан айырумен байланысты емес жаза тағайындауды өтінді.

«Өмірлік сабақ алдық»

«Болған жағдайға толық жауапкершілікті сезінеміз. Өзіміз үшін үлкен сабақ алдық, бұл бізге өмірлік сабақ болды. Заңды бұзғанымыз үшін шын жүректен өкінеміз. Маған және жұбайыма бас бостандығынан айырумен байланысты емес жаза тағайындап, жеңілдікпен қарауды сұраймын», - деді Төлегенова.

Сотталушы соңғы сөзінде сот кеңесу бөлмесіне шықпас бұрын прокурормен мәмілеге келу туралы өтінішхат білдірді.

Блогерлер Жанабыловтар кеше сотта соңғы сөз сөйлеуі тиіс еді, алайда Төлегенова денсаулығына байланысты сотқа келмегенін Жанабыловтың адвокаты хабарлаған болатын. Осыған байланысты процесс бүгінге ауыстырылды.

Жанабыловтарға немен айып тағылды?

Танымал блогерлерге ҚР Қылмыстық кодексінің 214-бабы, 2-бөлігі, 2-тармағы бойынша «Заңсыз кәсіпкерлік» және 218-бабы, 2-бөлігі, 1-тармағы бойынша «Қылмыстық жолмен алынған ақшаны немесе өзге де мүлікті заңдастыру (жылыстату)» баптары бойынша айыптар тағылды.

Прокурор блогерлерге қанша жыл сұрады?

Мемлекеттік айыптаушы Олжас Қайруллаев сот талқылауы барысында екі сотталушыны да барлық тағылған баптар бойынша кінәлі деп танып, оларға минималды қауіпсіздік мекемесінде 4 жыл бас бостандығынан айыруды, сондай-ақ мүліктерін тәркілеуді сұрады. Бұл ретте Эльмира Төлегенованың кәмелетке толмаған балалары бар екеніне байланысты оның жазасын бір жылға кейінге қалдыру ұсынылды.

Жанабыловтардың соты

16 наурызда Астанада танымал блогерлер Ерболат Жанабылов пен Эльмира Төлегенованың ісі бойынша басты сот отырысы басталды. Жұбайлар журналистердің сот тыңдаулары кезінде оларды бейнекамераға және фотоға түсіруіне қарсы шықты.

«Менің үлкен балам мектепке барады, ал балама біздің жеке өмірімізге қатысты сұрақтар қояды», - деп түсіндірді Төлегенова журналистерге.

Блогерлердің адвокаты сот отырысын жабық режимде өткізу туралы өтінішхат білдірді, прокурорлар бұған қарсылық білдірді. Нәтижесінде сот өтінішхатты қанағаттандырудан бас тартты. Сондай-ақ, сот отырысы кезінде Жанабыловтың адвокаты соттан істі прокурорға қайтаруды сұрады.

Бұған дейін сотта прокурордың аға көмекшісі Олжас Қайруллаев айыптау актісін оқып берген болатын. Онда Жанабыловтар ұсынған сыйлықтар мен жүлделер қатысушылардың ақшасы есебінен алынғаны, ал жарнамада жүлде қорының ұйымдастырушылардың өз қаражаты есебінен қалыптастырылғаны туралы әсер қалдырғаны көрсетілген. Тергеу мәліметтері бойынша, блогерлерге қатысты жобалар есепшоттарына 247 миллион 653 мың теңге түскен.

22 сәуірде Астана сотында блогерлер Ерболат Жанабылов пен Эльмира Төлегенованың ісі бойынша сот тергеуі аяқталды. Тараптардың пікірталасы кезінде прокурор блогерлерге нақты мерзімдерді сұрады.

Естеріңізге сала кетейік, 14 сәуірде сотта блогер Эльмира Төлегенова кінәсін ішінара мойындады. Бұған дейін сотта блогер Ерболат Жанабылов жауап берген болатын. Ол сотта жылап, кінәсін ішінара мойындады.

«Мен неге тек біз екенімізді түсінбеймін? Бұл аналарымызға, ата-анамызға өте ауыр тиеді. Мен түсінбеймін: мүмкін, біз біреудің жолын кестік пе? Менің орнымда кез келген адам болуы мүмкін. Бүгін емес, ертең. Мен тіпті жауларыма да мұндай жағдайға тап болып, сот алдында тұруды тілемеймін», - деді ол.