InfoHub Logo

Мемлекеттік әлеуметтік сақтандыру қоры (МӘСҚ) мен салық органдары деректерді жаппай салыстыруды бастайды. Түбіртексіз берілген жәрдемақылар қайта есептеліп, артық төленген сомалар өндіріп алынады. Бұл өзгерістер жеке кәсіпкерлер мен шағын бизнес өкілдеріне әсер етеді.

Бұл туралы Infohub.kz ақпарат агенттігі хабарлайды.

Жаңа талаптар кімдерге қатысты?

Жаңа ережелер ең алдымен өзін-өзі жұмыспен қамтығандарды, жеке кәсіпкерлерді, шаруа қожалықтарының иелерін және жеке практикамен айналысатындарды қамтиды. Бұрынғыдай әлеуметтік аударымдарды уақтылы төлеу жеткіліксіз болады. Енді табысты растау үшін фискалдық құжаттар, яғни арнайы мобильді қосымшаның чектерi немесе бақылау-касса машинасының фискалдық белгісі бар чектерi талап етіледі.

Бұл чектер әлеуметтік аударымдар жасалған күнге дейін мемлекеттік кірістер органдарында тіркелуі тиіс. Бұл шара жүктілік немесе жұмыстан айырылу сияқты жағдайлар бойынша жәрдемақы мөлшерін арттыру мақсатында табысты кейіннен көрсетуді болдырмайды.

Жүйелі кемшіліктер анықталды

Бұл өзгерістерді енгізуге Жоғары аудиторлық палатаның нұсқауы себеп болды. Палата қолданыстағы төлемдерді тағайындау моделінде жүйелі тәуекелдер барын анықтаған. Енді МӘСҚ мен салық органдарының деректерді автоматты түрде салыстыру жүйесі жұмыс істейді. Бұл жүйе әлеуметтік аударымдарды міндетті зейнетақы жарналарымен және МӘМС жарналарымен сәйкестендіреді. Сәйкессіздіктер тексеруге негіз болады, себебі бір төлем үшін табыс «жоғары», ал екіншісі үшін «төмен» болуы мүмкін емес.

Ақшаны қайтару қажеттілігі

Қор қызметкерлері қазіргі уақытта жәрдемақы алып жатқан азаматтарды жаппай тексеру жоспарланбағанын атап өтті. Алайда, кейбір жағдайларда ақшаны қайтару қажеттілігі туындауы мүмкін. Егер азаматтар жалған мәліметтер ұсынып, нәтижесінде артық жәрдемақы алған болса, онда артық төленген сомалар мен олардан ұсталған зейнетақы жарналары қайтарып алынады.

Қанша азаматтың табысын төмендетіп немесе толық көрсетпегені туралы ақпаратты ведомство ашып көрсетпеді. Алайда, әлеуметтік аударымдардың толықтығы үшін жауапкершіліктің төлеушілердің өздерінде екенін еске салды. Сондай-ақ, деректерді eGov немесе банк қосымшалары арқылы үнемі тексеріп отыру ұсынылады.

Қазіргі уақытта бұл бұйрықтың жобасы келісу кезеңінде.