InfoHub Logo

Алматыдағы танымал демалыс орны – Сайран көлінің суы жаз алдында сынақтан өтті. Алайда, нәтижелер көңіл көншітпейді. Судың сапасы нормативтерге сай келмегендіктен, көлде шомылуға әзірге рұқсат берілмейді. Бұған қоса, көлді толтыру жұмыстары тоқтатылып, оны уақытша босатуға мәжбүр болды.

Бұл туралы Infohub.kz ақпарат агенттігі хабарлайды.

Неге Сайран көлі босатылуда?

Жақында ғана суға толтырыла бастаған Сайран көлінің жұмысы тоқтатылды. Бұған себеп – көлді сумен қамтамасыз ететін Толе би көшесіндегі екі шандордың (гидротехникалық құрылғы) істен шығуы. Олардың дұрыс жұмыс істемеуі салдарынан су ағынын реттеу мүмкін болмай, көлді толық толтыру кедергі келтіруде.

Қала әкімдігінің хабарлауынша, жөндеу жұмыстары 1 маусымда басталып, 3 маусымға дейін аяқталады деп жоспарланған. Осыдан кейін көл қайта суға толтырылатын болады.

Сайранда шомылуға бола ма?

Көлдегі жөндеу жұмыстары аяқталғаннан кейін шомылуға рұқсат беріле ме деген сұраққа Алматы қалалық санитарлық-эпидемиологиялық бақылау департаменті жауап берді. Мамыр айында жүргізілген су сынақтарының нәтижесінде, Алмалы ауданы аумағындағы судың лактозаға төзімді ішек таяқшалары (ЛКП) және еріген оттегі деңгейі бойынша гигиеналық нормативтерге сәйкес келмейтіні анықталды. Ауэзов ауданынан алынған сынақтар әлі де зерттелуде.

Мамандардың айтуынша, судың сапасы өткен жылмен салыстырғанда өзгермеген. Көлге лас сулардың келуіне себеп ретінде Үлкен Алматы өзенінің ластануы мүмкін екені айтылады. Өзенге құйылған тұрмыстық қалдықтар мен канализация сулары көлге жетіп, судың сапасын нашарлатады. Бұл жағдай зертханалық зерттеулермен де расталып отыр.

Судың сапасын жақсарту үшін мамандар Үлкен Алматы өзенінің бойындағы қоқыс тастайтын орындарды анықтап, заң бұзушыларды жауапкершілікке тартуды ұсынып отыр. Сайран көліндегі судың жағдайы мамырдан қыркүйекке дейін ай сайын бақыланады.

Қандай жағдайда шомылуға рұқсат беріледі?

Қазіргі таңда Сайран көлінде шомылуға ресми түрде тыйым салынған. Көлде шомылу тек жағалауды абаттандыру жұмыстары аяқталып, санитарлық-эпидемиологиялық қорытынды алынып, судың гигиеналық нормативтерге сәйкес екені расталғаннан кейін ғана мүмкін болады.

Жөндеу жұмыстары басталмай тұрғандағы Сайран

21 мамырда жүргізілген тексеріс кезінде көлдің барлық жағалауында «Шомылуға тыйым салынады» деген белгілер орнатылғаны байқалды. Суға толы болғанына қарамастан, жағалаудағы құтқару пункттері жабық тұрды. Дежурлікте құтқарушылар да, қажетті құрал-жабдықтар да болмаған.

Құтқарушылар қашан пайда болады?

Алматы ТЖД мәліметінше, қазіргі уақытта құтқарушылар жағалауда күнделікті сағат 08:00-ден 22:00-ге дейін кезекшілік атқарады. 1 маусымнан бастап олар тәулік бойы жұмыс істейтін болады. Сондай-ақ, полиция қызметкерлерімен бірлескен рейдтер өткізіліп, су қауіпсіздігі ережелері туралы ақпараттар таратылуда.

Полиция қашан келеді?

Мамыр айының соңындағы мәлімет бойынша, модульдік пункттерде полиция қызметкерлерінің болмауына байланысты жөндеу жұмыстары мен нысанды әкімдік балансына беру рәсімдерінің аяқталмағаны айтылды. Дегенмен, қоғамдық тәртіпті қамтамасыз ету үшін полиция қызметкерлері жаяу патрульдеуді жүзеге асыруда. Кейбір күндері Ұлттық ұлан әскери қызметшілері де тәртіпті бақылайды.

Сайранды жаңғыртудағы дау

Сайран көлін жаңғырту жобасы Алматы билігінің 2025 жылғы ең көп талқыланған жобаларының бірі болды. Мердігер компания жұмысты уақытында аяқтамағаны үшін сотқа тартылып, 23 миллион теңгеден астам айыппұл төледі. Алайда, кейін сот шешімімен компанияны мемлекеттік сатып алуларға қатысушы ретінде әділетсіз деп тану туралы шешімнің күші жойылды.

Бұған дейін тұрғындар көлден шыққан жағымсыз иіс пен судың лайлануына шағымданған болатын.