ينتەرنەتتە 15 ميلليون قازاقستاندىقتىڭ جەكە دەرەكتەرىنىڭ داركنەتتە ساتىلىمعا قويىلعانى تۋرالى اقپارات پايدا بولدى. قازاقستاننىڭ جاساندى ينتەللەكت جانە سيفرلىق دامۋ مينيسترلىگى بۇل مالىمەتتەردى تەكسەرۋدى باستادى، دەپ حابارلايدى infohub.kz.
Mash باسىلىمىنىڭ مالىمەتىنشە، shymzz13 بۇركەنشىك اتىن جامىلعان بەلگىسىز حاكەر قازاقستاننىڭ 15 ميلليون تۇرعىنى تۋرالى مالىمەتتەرى بار دەرەكقوردى ساتۋ تۋرالى حابارلاندىرۋ ورنالاستىرعان. بۇل ەل حالقىنىڭ شامامەن تورتتەن ءۇش بولىگىن قۇرايدى. ساتۋشى بۇل دەرەكتەردى مەملەكەتتىك eGov قىزمەتىن بۇزۋ ارقىلى العانىن مالىمدەگەن. 2،7 گيگابايتتىق فايل ءۇشىن ول 0،5 بيتكوين، ياعني شامامەن 32 مىڭ اقش دوللارىن سۇراعان. ساتۋشىنىڭ ايتۋىنشا، بازادا 47 ميلليون جول بار: پاسپورت دەرەكتەرى، تەلەفون نومىرلەرى، ەلەكتروندىق پوشتا مەكەنجايلارى، جۇمىس ورىندارى، قۇجاتتاردىڭ سكانەرلەرى جانە قۇپياسوزدەر.
كيبەرقاۋىپسىزدىك ساراپشىلارى بۇل بازانى ۋكرايندىق كولل-ورتالىقتار ساتىپ الۋى مۇمكىن دەپ الاڭداۋلى. ولار بۇعان دەيىن دە مۇنداي دەرەكتەردى الاياقتىق سحەمالاردا قولدانعان. مىسالى، جاقىندا الاياقتار قازاقستاندى رەسەيمەن شاتاستىرىپ، پاۆلودارداعى زەينەتكەرلەردى بانكتە جارىلىس جاساۋعا كوندىرگەن.
NUR.KZ ءتىلشىسى سيفرلىق دامۋ مينيسترلىگىنىڭ ءباسپاسوز قىزمەتىنە ساۋال جولدادى. ۆەدومستۆو قازاقستاندىقتاردىڭ جەكە دەرەكتەرىنىڭ داركنەتتە جاريالانعانى تۋرالى تاراعان اقپاراتتان حاباردار ەكەنىن راستادى. قازىرگى ۋاقىتتا ءپروفيلدى قىزمەتتەرمەن بىرلەسىپ جاريالانعان مالىمەتتەرگە تەحنيكالىق تەكسەرۋ جۇرگىزىلۋدە، ونىڭ ىشىندە ۇسىنىلعان دەرەكتەر ۇلگىلەرىن تالداۋ جانە ولاردىڭ ىقتيمال شىعۋ كوزىن انىقتاۋ بار. ازىرگە ەلەكتروندىق ۇكىمەتتىڭ اقپاراتتىق جۇيەلەرىنىڭ بۇزىلعانى جانە اتالعان بازانىڭ تىكەلەي eGov-دان الىنعانى تۋرالى راستالعان دەرەكتەر جوق.
مينيسترلىك سونىمەن قاتار جاريالانىمداردا كورسەتىلگەن اقپاراتتىڭ ءبىر بولىگى ەلەكتروندىق ۇكىمەت دەرەكتەرىنىڭ قۇرىلىمى مەن فورماتىنا سايكەس كەلمەيتىنىن اتاپ ءوتتى. اتاپ ايتقاندا، eGov-دا پاسپورتتاردىڭ سكانەر-كوشىرمەلەرى كورسەتىلگەندەي ساقتالمايدى، ال سيفرلىق قۇجاتتار باسقا فورماتتا بولادى. داركنەت پايدالانۋشىسىنىڭ بازانىڭ شىعۋ تەگى تۋرالى مالىمدەمەسى eGov-دىڭ بۇزىلۋ فاكتىسىن راستاۋ رەتىندە قاراستىرىلا المايدى. تەحنيكالىق تەكسەرۋ جالعاسۋدا، ناتيجەلەرى بويىنشا قوسىمشا اقپارات بەرىلەتىن بولادى.
مينسيفرا ازاماتتارعا سيفرلىق قاۋىپسىزدىكتىڭ نەگىزگى شارالارىن ساقتاۋدى ۇسىنادى: SMS-كودتاردى، قۇپياسوزدەردى جانە ەسق دەرەكتەرىن ءۇشىنشى تۇلعالارعا بەرمەۋ، كۇدىكتى سىلتەمەلەرگە وتپەۋ جانە ءارتۇرلى سەرۆيستەر ءۇشىن ءارتۇرلى قۇپياسوزدەردى قولدانۋ.