قازاقستاندا 2027 جىلدان باستاپ كەيبىر الەۋمەتتىك جاردەماقىلاردى ەسەپتەۋ ءتاسىلىن وزگەرتۋ جوسپارلانۋدا: ايلىق ەسەپتىك كورسەتكىش (اەك) وسسە دە، جەكەلەگەن تولەمدەر بۇرىنعى دەڭگەيدە قالۋى مۇمكىن. بۇل ق ر قارجى مينيسترلىگى جاريالاعان 2027–2029 جىلدارعا ارنالعان رەسپۋبليكالىق بيۋدجەت جوباسىنان كورىنەدى، دەپ حابارلايدى infohub.kz سايتى.
قۇجاتقا سايكەس، 2027 جىلى اەك 8،5%-عا ءوسىپ، قازىرگى 4 325 تەڭگەنىڭ ورنىنا 4 693 تەڭگەنى قۇراۋى مۇمكىن. ادەتتە اەك-تىڭ ۇلعايۋى وسى كورسەتكىشكە بايلانىستى جاردەماقىلاردىڭ دا وسۋىنە اكەلەتىن. الايدا جاڭا بيۋدجەت جوباسىندا كەيبىر الەۋمەتتىك كومەك تۇرلەرىن ەسەپتەۋ ءۇشىن اەك-تى 2026 جىلعى دەڭگەيدە ساقتاۋ ۇسىنىلۋدا.
جوبانىڭ 11-بابى 1-تارماعىندا ازاماتتاردىڭ جەكەلەگەن ساناتتارىنا الەۋمەتتىك جاردەماقىلاردى ەسەپتەۋ ءۇشىن اەك 4 325 تەڭگە مولشەرىندە قالاتىنى كورسەتىلگەن. بۇل ق ر الەۋمەتتىك كودەكسىنىڭ 10-بابى 1-تارماعىنىڭ 1)، 6) جانە 9) تارماقشالارىندا، سونداي-اق ق ر «جەر استى جانە اشىق تاۋ-كەن جۇمىستارىندا، ەرەكشە زياندى جانە ەرەكشە اۋىر ەڭبەك جاعدايلارىندا نەمەسە زياندى جانە اۋىر ەڭبەك جاعدايلارىندا جۇمىس ىستەگەن ادامدارعا ارنالعان مەملەكەتتىك ارناۋلى جاردەماقى تۋرالى» زاڭىنىڭ 6 جانە 7-باپتارىندا جانە ق ر ازاماتتىق كودەكسىنىڭ (ەرەكشە ءبولىم) 945-بابىنىڭ 4-تارماعىندا كوزدەلگەن جاردەماقىلارعا قاتىستى.
وسىلايشا، كەلەسى مەملەكەتتىك كومەك تۇرلەرىن الۋشىلار تولەمدەردىڭ ءوسۋىن كورمەيدى: بالالارى بار وتباسىلاردى الەۋمەتتىك قورعاۋ (تۋۋعا، بالا كۇتىمىنە، كوپبالالى وتباسىلارعا جانە ت.ب. جاردەماقىلار)؛ ازاماتتاردىڭ جەكەلەگەن ساناتتارىنا ارناۋلى مەملەكەتتىك جاردەماقى تۇرىندەگى الەۋمەتتىك كومەك ( ۇلى وتان سوعىسىنىڭ ارداگەرلەرى، ولارعا تەڭەستىرىلگەن ادامدار، «حالىق قاھارمانى» اتاعىن العان ازاماتتار)؛ زەينەتاقى تولەمدەرىن نەمەسە مەملەكەتتىك بازالىق زەينەتاقى تولەمىن، سونداي-اق مەملەكەتتىك الەۋمەتتىك جاردەماقىلاردى الۋشى قايتىس بولعان جاعدايدا جەرلەۋگە ءبىرجولعى تولەم.
كۇنكورىس مينيمۋمى (كم) بويىنشا دا وسىنداي جاعداي قالىپتاسۋدا. جالپى كورسەتكىش 50 851 تەڭگەدەن 55 173 تەڭگەگە دەيىن وسەدى، ءبىراق كەيبىر جاردەماقىلاردى ەسەپتەۋ ءۇشىن ونىڭ مولشەرى 50 851 تەڭگە دەڭگەيىندە قالادى. بۇل ق ر الەۋمەتتىك كودەكسىنىڭ 10-بابى 1-تارماعىنىڭ 5)، 6-1) جانە 8) تارماقشالارىندا كورسەتىلگەن ادامدارعا تولەمدەرگە اسەر ەتەدى.
سونىمەن قاتار، تۇزەتۋلەر جان باسىنا شاققانداعى ورتاشا تابىسى كەدەيلىك شەگىنەن اسپايتىن ادامدارعا (وتباسىلارعا) ارنالعان اتاۋلى الەۋمەتتىك كومەككە اسەر ەتپەيدى. ولار ءۇشىن اەك پەن كم جاڭا مولشەردە قولدانىلادى.
وسىلايشا، ەگەر رەسپۋبليكالىق بيۋدجەت جوباسى قابىلدانسا، 2027 جىلى اەك پەن كم-نىڭ جالپى وسۋىنە قاراماستان، كەيبىر جاردەماقىلار 2026 جىلعى دەڭگەيدە قالادى.