اباي وبلىسىنداعى سەمەي – كۋرچاتوۆ تاس جولىندا بولعان قايعىلى جول-كولىك وقيعاسى سالدارىنان ءتورت ادام قازا تاپتى، ونىڭ ىشىندە توتەنشە جاعدايلار دەپارتامەنتىنىڭ ەكى قىزمەتكەرى بار، دەپ حابارلايدى infohub.kz سايتى.
اباي وبلىسى تجد مالىمەتىنشە، 2026 جىلعى 26 تامىزدا ساعات 15:30 شاماسىندا ۆەدومستۆوعا جول-كولىك وقيعاسى تۋرالى حابارلاما تۇسكەن. اپات سالدارىنان ءتورت ادام قازا تاپقان، ولاردىڭ قاتارىندا ايماقتاعى ءتجد-نىڭ ەكى قىزمەتكەرى دە بولعان.
دەپارتامەنت ءباسپاسوز قىزمەتى كوڭىل ايتتى: «دەپارتامەنتتىڭ جەكە قۇرامى مەن باسشىلىعى قازا تاپقانداردىڭ وتباسىلارىنا، تۋعان-تۋىستارىنا جانە جاقىندارىنا شىن جۇرەكتەن كوڭىل ايتادى. بۇل اۋىر قايعى جانە ورنى تولماس شىعىن. دەپارتامەنت قازا تاپقان قىزمەتكەرلەردىڭ وتباسىلارىنا بارلىق قاجەتتى كومەك پەن قولداۋدى كورسەتىپ، كورسەتە بەرەدى».
قازىرگى ۋاقىتتا اباي وبلىسى تجد وقيعاعا بايلانىستى قىزمەتتىك تەرگەۋ باستادى. ونىڭ ناتيجەلەرى بويىنشا لاۋازىمدى تۇلعالاردىڭ ارەكەتتەرىنە وبەكتيۆتى باعا بەرىلەتىن بولادى.
ەسكە سالايىق، سەمەي – كۋرچاتوۆ تاس جولىنىڭ 35-شاقىرىمىندا ەكى كولىك سوقتىعىسقان: Chevrolet Nexia جانە Kia Rio. پوليسيانىڭ الدىن الا دەرەكتەرى بويىنشا، Chevrolet Nexia جۇرگىزۋشىسى «گازەلدى» باسىپ وزۋ كەزىندە قارسى باعىتقا شىعىپ، Kia Rio-مەن بەتپە-بەت سوقتىعىسقان. اپات ءساتى بەينەگە ءتۇسىپ قالعان.
سوقتىعىسۋ سالدارىنان ەكى كولىكتىڭ دە جۇرگىزۋشىلەرى مەن جولاۋشىلارى وقيعا ورنىندا قازا تاپتى. سوتقا دەيىنگى تەرگەۋ باستالدى.