اباي وبلىسىندا پوليسيا قىزمەتكەرلەرى جوق پاتەرلەردى جالعا بەرۋگە بايلانىستى بىرنەشە الاياقتىق جاسادى دەگەن كۇدىككە ىلىنگەن ورال قالاسىنىڭ 22 جاستاعى تۇرعىنىن ۇستادى. جاس جىگىت تانىمال ينتەرنەت-پلاتفورمالاردا تاۋلىكتىك جالعا بەرۋ تۋرالى حابارلاندىرۋلار ورنالاستىرعان، دەپ حابارلايدى infohub.kz سايتى.
وڭىرلىك پوليسيا دەپارتامەنتىندە ايتىلعانداي، كۇدىكتى الەۋەتتى جالعا الۋشىلارعا الدىن الا تولەم مەن كەپىلدىك اقشا اۋدارۋدى ۇسىنعان، سودان كەيىن بايلانىسقا شىعۋدى توقتاتقان. جابىرلەنۋشىلەر كورسەتىلگەن مەكەنجايلارعا كەلگەندە، پاتەرلەردىڭ ەشقاشان جالعا بەرىلمەگەنى انىقتالعان.
جەدەل-ىزدەستىرۋ ءىس-شارالارى بارىسىندا ءتارتىپ ساقشىلارى كۇدىكتىنىڭ تۇلعاسىن انىقتادى. ول ورال قالاسىنىڭ 22 جاستاعى تۇرعىنى بولىپ شىقتى. پوليسيا جاريالاعان كادرلاردا ورىندىقتا وتىرعان جاس جىگىتتى جەرگە قۇلاتىپ، ۇستاپ جاتقانى كورىنەدى. ءقازىر ول ۋاقىتشا ۇستاۋ يزولياتورىنا قامالدى.
سوتقا دەيىنگى تەرگەۋ اياسىندا ۇستالعان ادامنىڭ 40-تان استام الاياقتىق ەپيزودىنا قاتىسى انىقتالدى. جابىرلەنۋشىلەرگە كەلتىرىلگەن زالالدىڭ الدىن الا سوماسى 750 مىڭ تەڭگەدەن اسادى.
الاياقتىق فاكتىلەرى بويىنشا سوتقا دەيىنگى تەرگەۋ جۇرگىزىلۋدە. پوليسيا قىزمەتكەرلەرى باسقا دا ىقتيمال جابىرلەنۋشىلەردى انىقتاۋدا.