الماتى وبلىسى پوليسيا دەپارتامەنتى نەللي ميحەەۆانىڭ تاۋدان تابىلعان ادام سۇيەكتەرى ونىڭ اكەسىنە تيەسىلى دەگەن مالىمدەمەسىن راستادى، دەپ حابارلايدى infohub.kz.
الماتى وبلىسى پوليسيا دەپارتامەنتىنىڭ ءباسپاسوز قىزمەتى تالعار اۋدانىنداعى سەۆەرسوۆ مۇزدىعىنان ادام دەنەسىنىڭ تابىلۋىنا بايلانىستى تەكسەرۋ جۇرگىزىلىپ جاتقانىن حابارلادى.
«جۇرگىزىلگەن ءىس-شارالار بارىسىندا قايتىس بولعان ادامنىڭ جەكە باسى انىقتالدى. ول بۇرىن حابار-وشارسىز كەتكەن الماتى قالاسىنىڭ تۇرعىنى بولىپ شىقتى. دەرەكتەرگە سايكەس، ەر ادام 19 جىل بويى ىزدەۋدە بولعان. بولجام بويىنشا، مۇزدىقتىڭ ەرۋى سالدارىنان دەنە جەر بەتىنە شىعىپ، تابىلعان»، — دەپ حابارلادى پوليسيادا.
پوليسيا دەپارتامەنتىنىڭ مالىمەتىنشە، قازىرگى ۋاقىتتا وقيعانىڭ بارلىق ءمان-جايىن جانە ءولىم سەبەپتەرىن انىقتاۋعا باعىتتالعان قاجەتتى شارالار جۇرگىزىلۋدە. تەكسەرۋ قورىتىندىسى بويىنشا قولدانىستاعى زاڭناما اياسىندا ءتيىستى پروسەسسۋالدىق شەشىم قابىلداناتىن بولادى.
ەسكە سالا كەتەيىك، ءبىر اپتا بۇرىن الماتى وبلىسى تالعار اۋدانىنداعى سەۆەرسوۆ مۇزدىعىنان بەلارۋس تۋريستەرى توبى ادام سۇيەكتەرى مەن تۋريستىك جابدىقتاردى تاپقانى بەلگىلى بولعان ەدى. كەيىن قازاقستاندىق نەلليا ميحەەۆا Instagram-داعى stories-تا الماتى وبلىسىنىڭ تاۋلارىنان تابىلعان سۇيەكتەر ونىڭ اكەسىنە تيەسىلى ەكەنىن ايتقان.
«بۇگىن ءبىزدىڭ وتباسى ءۇشىن ءبىر جاعىنان قايعىلى، ءبىر جاعىنان قۋانىشتى كۇن. 19 جىلدان كەيىن اكەمنىڭ سۇيەگى تابىلدى. سەۆەرسيەۆ مۇزدىعى ەرىپ، بەلارۋس تۋريستەرى تاۋىپ الدى، ولارعا ۇلكەن راحمەت، ءوتىپ كەتپەي، اكەمنىڭ سۇيەگى مەن ريۋكزاگىن تاپقاندارى ءۇشىن»، — دەدى ايەل.
ميحەەۆانىڭ ايتۋىنشا، ريۋكزاكتان اكەسىنىڭ اتىنا جازىلعان جەكە كۋالىك تە تابىلعان.