قازاقستاندا نەكە تىركەۋ مەرزىمىن ۇزارتۋ قاجەتتىگى تۋرالى شىندىققا جاناسپايتىن اقپارات تارالۋدا. ادىلەت مينيسترلىگى ازاماتتاردى الاياقتىق سحەما تۋرالى ەسكەرتەدى، دەپ حابارلايدى infohub.kz.
ۆەدومستۆونىڭ ءباسپاسوز قىزمەتىنىڭ مالىمەتىنشە، الەۋمەتتىك جەلىلەردە جانە ەكىنشى دەڭگەيلى بانكتەردىڭ قوسىمشالارى ارقىلى «نەكە تىركەۋ مەرزىمىن ۇزارتۋ» تالابى بار حابارلامالار تاراتىلۋدا. مينيسترلىك بۇل اقپاراتتىڭ الاياقتىق سيپاتىن اتاپ ءوتتى.
ادىلەت مينيسترلىگىنىڭ رەسمي وكىلى تالعات ءۋالي تۇسىندىرگەندەي، نەكە-وتباسى زاڭناماسىنا سايكەس، نەكە ءبىر رەت تىركەلەدى جانە ونىڭ قولدانىلۋ مەرزىمى بولمايدى، سوندىقتان ونى ۇزارتۋ قاجەت ەمەس. نەكەنى توقتاتۋ تەك ەرلى-زايىپتىلاردىڭ بىرەۋىنىڭ نەمەسە ەكەۋىنىڭ ارىزى بويىنشا اجىراسۋ ارقىلى، سونداي-اق زاڭدا كوزدەلگەن وزگە جاعدايلاردا جۇزەگە اسىرىلادى.
اجىراسۋ تىركەۋشى ورگان ارقىلى نەمەسە سوت تارتىبىمەن جۇرگىزىلەدى. تىركەۋشى ورگان ارقىلى اجىراسقان كەزدە نەكە مەملەكەتتىك تىركەۋ كۇنىنەن باستاپ، ال سوت تارتىبىمەن اجىراسقاندا سوت شەشىمى زاڭدى كۇشىنە ەنگەن كۇننەن باستاپ توقتاتىلادى.
وسىعان بايلانىستى ادىلەت مينيسترلىگى ازاماتتاردى مۇنداي حابارلامالارعا سەنبەۋگە، سىلتەمەلەر بويىنشا وتپەۋگە جانە جەكە دەرەكتەرىن ءۇشىنشى تۇلعالارعا بەرمەۋگە شاقىرادى. شىنايى اقپارات الۋ ءۇشىن تەك رەسمي كوزدەرگە جۇگىنۋ ۇسىنىلادى.