اتىراۋ وبلىسىنداعى قايعىلى وقيعادان كەيىن اقبايان مۇقانعاليەۆا پسيحياتريالىق مەكەمەدەن شىعىپ، بالالارىن العاش رەت كوردى. infohub.kz سايتىنىڭ حابارلاۋىنشا، جانگەلدين اۋىلىنداعى قازا تاپقان وتباسى مۇشەلەرىنىڭ قىزى ءارى قارىنداسى، سونداي-اق سوتتالعان سۇلتان سارسەماليەۆتىڭ بۇرىنعى ايەلى كامەلەتكە تولماعانداردى بەيىمدەۋ ورتالىعىنداعى ءتورت بالاسىمەن كەزدەسە الدى.
«قازينفورم» ماا مالىمەتىنشە، اقبايان مەن سۇلتاننىڭ بالالارى اتىراۋ وبلىسىنداعى ارناۋلى ورتالىقتا تۇرىپ، ءبىلىم الۋدا. ەڭ كىشكەنتايى – ءبىر جارىم جاسار ۇلى – بالالار ۇيىندە تاربيەلەنۋدە. كامەلەتكە تولماعانداردى بەيىمدەۋ ورتالىعىنىڭ ديرەكتورى كۇندىز گينياتوۆا مۇقانعاليەۆانىڭ وتكەن اپتادا بالالارىمەن العاش رەت كەزدەسكەنىن، ال ەكىنشى كەزدەسۋ 1 قىركۇيەكتە وتكەنىن راستادى.
گينياتوۆانىڭ تۇسىندىرۋىنشە: «ول بالالارعا ولاردىڭ زاڭدى وكىلى رەتىندە كەلدى. اتا-انا قۇقىعىنان ايىرىلماعان. جالپى، بالالارمەن كەزدەسۋلەر ءار جۇما سايىن ساعات 17:00-دەن 19:00-گە دەيىن كەستە بويىنشا ۇيىمداستىرىلادى. بۇل ەرەكشەلىكتى ول باستاپقىدا بىلمەگەن. 27 تامىزدا كەلدى. كەيىن ول بالالاردى ءبىلىم كۇنىمەن قۇتتىقتاۋعا كەلگەنىن ايتىپ، 1 قىركۇيەكتە ولارمەن كەزدەستى».
ورتالىق ديرەكتورى بالالاردىڭ دەنساۋلىق جاعدايى مەن كوڭىل-كۇيى جاقسى ەكەنىن اتاپ ءوتتى. بالالاردى ورتالىققا ورنالاستىرۋ تۋرالى شەشىمدە ولاردىڭ بولۋ مەرزىمى كورسەتىلمەگەن. مۇقانعاليەۆانىڭ تۋىستارى ونىڭ بالالارىن تانيتىنىن، الايدا ەمدەلۋدى ول ءارى قاراي دا جالعاستىراتىنىن حابارلايدى.
ەسكە سالايىق، بيىلعى جىلدىڭ قاڭتارىندا اتىراۋ وبلىسىندا ءتورت ادامنان تۇراتىن وتباسىنىڭ جوعالعانى بەلگىلى بولعان ەدى: ەر ادام، ونىڭ ايەلى جانە ولاردىڭ ەكى ەرەسەك بالاسى. الدىمەن ەگدە جاستاعى جۇبايلاردىڭ، كەيىن بالالارىنىڭ دەنەلەرى تابىلدى. كىسى ولتىرۋگە كۇدىك بۇرىنعى كۇيەۋ بالا سۇلتان سارسەماليەۆكە ءتۇستى. بۇعان دەيىن ايىپتالۋشى قىلمىس سەبەبىن اشىپ ايتقان بولاتىن، ال پروكۋرور وعان ءومىر بويى باس بوستاندىعىنان ايىرۋ جازاسىن سۇراعان. 14 شىلدەدە سارسەمالييەۆ ءومىر بويى باس بوستاندىعىنان ايىرۋعا سوتتالدى.