قازاقستاندا ءبىر توننا اقبوكەن ءمۇيىزى ەلەكتروندىق ساۋداعا قويىلدى — لوتتىڭ باستاپقى قۇنى 1،2 ملرد تەڭگەدەن اسادى، دەپ حابارلايدى infohub.kz سايتى.
لوت e-Qazyna.kz ەلەكتروندىق ساۋدا پورتالىندا جاريالاندى. ءمۇيىزدىڭ بارلىق كولەمىنىڭ جالپى قۇنى — 1 227 148 000 تەڭگە. لوت سيپاتتاماسىندا ءمۇيىزدىڭ ۇزىندىعى 25 سانتيمەترگە جەتەتىنى كورسەتىلگەن. حابارلاندىرۋعا تىركەلگەن سۋرەتتەرگە قاراعاندا، مۇيىزدەر قوراپتارعا سالىنعان.
ساتۋشى — «جاسىل دامۋ» اكسيونەرلىك قوعامى. ساتۋعا ەكولوگيا جانە تابيعي رەسۋرستار ءمينيسترى ەرلان نىسانباەۆتىڭ 2026 جىلعى 30 شىلدەدەگى بۇيرىعى نەگىز بولدى.
«„جاسىل دامۋ“ اكسيونەرلىك قوعامىنا اقبوكەن دەريۆاتتارىن 1 (ءبىر) توننا كولەمىندە ساتۋدى جۇزەگە اسىرۋ»، — دەلىنگەن قۇجاتتا.
بۇل شەشىم ەكولوگيا جانە تابيعي رەسۋرستار ءمينيسترىنىڭ 2026 جىلعى 22 شىلدەدەگى № 140 بۇيرىعىمەن بەكىتىلگەن اقبوكەن دەريۆاتتارىن ساتۋ قاعيدالارىنا سايكەس قابىلدانعانى اتاپ وتىلگەن. بۇل تۋرالى بۇيرىقتا جازىلعان.
سونىمەن قاتار قۇجاتتا ءمۇيىزدىڭ ءبىر كيلوگراممىنىڭ قۇنى بەلگىلەنگەن. «اقبوكەن ءمۇيىزىنىڭ ءبىر كيلوگراممىنىڭ باعاسىن 2600 (ەكى مىڭ التى ءجۇز) اقش دوللارىنا بالامالى سومادا بەلگىلەۋ»، — دەلىنگەن بۇيرىقتا.