اقمولا وبلىسىندا ماس كۇيىندە كولىك جۇرگىزگەن، جۇرگىزۋشى كۋالىگى جوق ايەل ۇستالدى. ول دوستارىن ۇيلەرىنە جەتكىزگىسى كەلگەنىن ايتقان. بۇل تۋرالى infohub.kz سايتى حابارلايدى.
وقيعا 24 تامىزدا ساعات 02:27 شاماسىندا بۋلاندى اۋىلىندا بولعان. پاترۋلدىك پوليسيا باتالونىنىڭ قىزمەتكەرلەرى Audi B4 كولىگىن بايقاپ، تەكسەرۋگە توقتاتپاق بولعان. الايدا جۇرگىزۋشى توقتاۋ تالابىن ەلەمەي، جىلدامدىقتى ارتتىرىپ، ءارى قاراي جۇرە بەرگەن.
كولىكتى تۇرعىن ءۇيدىڭ اۋلاسىندا توقتاتا العان. رولدە ايەل وتىرعان. قۇجاتتارىن تەكسەرۋ كەزىندە ونىڭ جۇرگىزۋشى كۋالىگى جوق ەكەنى انىقتالعان. سونداي-اق، ايەلمەن سويلەسۋ بارىسىندا پوليسەيلەر اراق ىشكەنىن سەزگەن.
ۇستالعان ايەلدىڭ ايتۋىنشا، ول دوستارىمەن كەزدەسىپ، ءبارى بىرگە ىشىمدىك ىشكەن. كەيىن ول دوستارىن ۇيلەرىنە جەتكىزۋ ءۇشىن كولىككە وتىرعان. كولىك ايەلدىڭ مەنشىگىندە ەكەن.
قۇقىق بۇزۋشىلىق فاكتىسى بويىنشا ايەلگە قاتىستى زاڭدا كوزدەلگەن شارالار قابىلدانعان.