اقمولا وبلىسىندا جەرگىلىكتى تۇرعىننىڭ سەرگەكتىگىنىڭ ارقاسىندا جول قوزعالىسى ەرەجەلەرىن ورەسكەل بۇزعان توعىز جۇرگىزۋشى جاۋاپقا تارتىلدى. ەر ادام ءقاۋىپتى مانەۆرلەردى بەينەگە ءتۇسىرىپ، جازبانى پوليسياعا جىبەرگەن، دەپ حابارلايدى infohub.kz سايتى.
وبلىستىق پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، ازامات ارايلى اۋىلىنا كىرە بەرىستە ءقاۋىپتى جۇرگىزۋگە كۋا بولعان. ول بۇزۋشىلىقتاردى كامەراعا ءتۇسىرىپ، بارلىق قاجەتتى دالەلدەمەلەردى قوسا وتىرىپ، «ومنيكانالدىلىق» جۇيەسى ارقىلى ماتەريالداردى جولداعان.
جازبادا جۇرگىزۋشىلەردىڭ «باسىپ وزۋعا تىيىم سالىنادى» جانە «ەلدى مەكەننىڭ باسى» جول بەلگىلەرىن ەلەمەيتىنى كورىنەدى. ولار جول جيەگىمەن باسىپ وزۋ، اۆاريالىق جاعداي تۋعىزۋ جانە ۇزدىكسىز سىزىق ارقىلى قارسى باعىتقا شىعۋ سياقتى ارەكەتتەر جاساعان.
ءوتىنىشتى قاراۋ قورىتىندىسى بويىنشا پوليسەيلەر قۇقىق بۇزۋشىلارعا قاتىستى توعىز اكىمشىلىك حاتتاما تولتىردى.
پوليسيا دەپارتامەنتىندە مۇنداي ارەكەتتەر جول قوزعالىسى قاۋىپسىزدىگىنە ەلەۋلى ءقاۋىپ توندىرەتىنىن اتاپ ءوتتى. «اسىرەسە ەلدى مەكەننىڭ جانىندا جول جيەگىمەن باسىپ وزۋ جانە قارسى باعىتقا شىعۋ ءقاۋىپتى. ازامات ۇسىنعان بەينەجازبانىڭ ارقاسىندا ءبىز وقيعانىڭ ءمان-جايىن وبەكتيۆتى تۇردە انىقتاپ، زاڭدا كوزدەلگەن شارالاردى قولدانا الدىق»، — دەپ اتاپ ءوتتى ۆەدومستۆودا.
ءوتىنىش بەرۋشىنىڭ ءوزى مۇنداي جۇرگىزۋشىلەردىڭ مىنەز-قۇلقى قايعىلى سالدارعا اكەلۋى مۇمكىن بولعاندىقتان، بەيجاي قالا المايتىنىن ءتۇسىندىردى. «مەنىڭ ويىمشا، ءارقايسىمىز جولداعى قاۋىپسىزدىك ءۇشىن ءوز جاۋاپكەرشىلىگىمىزدى ءتۇسىنۋىمىز كەرەك. جۇرگىزۋشىلەردىڭ جوعارى جىلدامدىقپەن ەرەجە بۇزىپ، باسقا ادامدارعا ءقاۋىپ توندىرگەنىن كورگەندە، شەتتە قالۋعا بولمايدى. سوندىقتان مەن جازبانى پوليسياعا تاپسىرۋدى ءجون كوردىم جانە فاكتىلەر بويىنشا ءتيىستى قۇقىقتىق باعا بەرىلەدى دەپ ۇمىتتەندىم»، — دەدى اقمولالىق.
پوليسيا ءوتىنىش بەرۋشىگە ازاماتتىق ۇستانىمى مەن جول قوزعالىسى قاۋىپسىزدىگىن قامتاماسىز ەتۋگە كومەكتەسكەنى ءۇشىن العىس ءبىلدىردى.