اقتوبەدە مەرزىمدى قىزمەتتەگى اسكەري قىزمەتشى سەرجانتتار تاراپىنان زورلىق-زومبىلىققا ۇشىراعانىن ايتىپ وتىر. وسى فاكتى بويىنشا سوتقا دەيىنگى تەرگەۋ باستالدى، دەپ حابارلايدى infohub.kz سايتى.
Lada.kz باسىلىمىنىڭ حابارلاۋىنشا، اقتاۋ تۇرعىنى گۇلدانا كەتىباەۆا 18 جاستاعى ۇلىنىڭ بيىلعى جىلدىڭ 3 شىلدەسىندە اسكەرگە شاقىرىلعانىن جانە ءقازىر اقتوبەدەگى № 6655 ۇلتتىق ۇلان اسكەري بولىمىندە قىزمەت ءوتىپ جاتقانىن ايتتى.
ايەلدىڭ سوزىنشە، 4 قىركۇيەكتە وعان اقتوبەدەگى اۋرۋحانادان قوڭىراۋ شالىپ، ۇلىنىڭ ءۇش كۇننەن بەرى سوندا جاتقانىن حابارلاعان. الدىمەن ونى ۋرولوگ قاراعان، الايدا تالداۋلار ينفەكسيانى انىقتاماعان. وسىدان كەيىن تراۆماتولوگ شاقىرىلىپ، ول قۋىق پروبلەمالارىن العان جاراقاتپەن بايلانىستىرعان، دەيدى گۇلدانا كەتىباەۆا.
دارىگەرمەن سويلەسكەننەن كەيىن جىگىت اناسىنا بولىمدە ونى مەزگىل-مەزگىل ۇرىپ-سوققانىن ايتقان. تراۆماتولوگ اسكەري قىزمەتشىنى تىڭداپ، پوليسيانى شاقىرعان. سارباز ارىز جازعان. كەيىن پوليسيادا اناسىمەن بەينەبايلانىس كەزىندە ونى اعا سەرجانت پەن تاعى ەكى سەرجانت ۇرعانىن مالىمدەگەن.
NUR.KZ ءتىلشىسى قازاقستان رەسپۋبليكاسى ىشكى ىستەر مينيسترلىگىنىڭ ءباسپاسوز قىزمەتىنە ساۋال جولداعان. ق ر ۇلتتىق ۇلانى «باتىس» وڭىرلىك قولباسشىلىعىنىڭ جاۋابىندا بۇل وقيعا بويىنشا باتىس وڭىرلىك اسكەري-تەرگەۋ باسقارماسىنىڭ اقتوبە ءبولىمى سوتقا دەيىنگى تەرگەۋ جۇرگىزىپ جاتقانى حابارلانعان. قازىرگى ۋاقىتتا ءىستىڭ بارلىق ءمان-جايى انىقتالۋدا. جان-جاقتى جانە وبەكتيۆتى تەكسەرۋ ناتيجەلەرى بويىنشا ءتيىستى قۇقىقتىق باعا بەرىلەتىن بولادى.