اقتوبەدە ءوز اناسىن ءولتىرىپ، اجەسىنە شابۋىل جاساعان كامەلەتكە تولماعان بالاعا قاتىستى سوت پروسەسى اياقتالدى. سوت شەشىمىمەن پسيحيكالىق بۇزىلۋى بار ءجاسوسپىرىم مامانداندىرىلعان ستاسيوناردا ءماجبۇرلى ەمنەن وتەدى، دەپ حابارلايدى infohub.kz.
قايعىلى وقيعا 2025 جىلعى 2 جەلتوقساندا اقتوبە ورتالىعىنداعى پاتەرلەردىڭ بىرىندە بولدى. 11-سىنىپ وقۋشىسى 41 جاستاعى اناسىنا ومىرمەن سىيىسپايتىن جاراقات كەلتىرگەن. سونداي-اق ءجاسوسپىرىمنىڭ 72 جاستاعى اجەسى زارداپ شەكتى، ول اۋرۋحاناعا جات قىزىلدى، ءبىراق ونىڭ ءومىرىن ساقتاپ قالۋعا مۇمكىندىك تۋدى.
پاتەردەن ايقايلاعان داۋىستى ەستىگەن كورشىلەر پوليسياعا حابارلادى. وقيعا ورنىنا كەلگەن ءتارتىپ ساقشىلارى ءجاسوسپىرىمدى ۇستادى. تەرگەۋ بارىسىندا انىقتالعانداي، وتباسى تۇرمىستىق جاعىنان جاقسى بولعان: جىگىت جەكە مەكتەپتە وقىپ، ۇلگەرىمى جاقسى بولعان، كورشىلەر ونى تاربيەلى ءارى سىپايى دەپ سيپاتتاعان. ونىڭ ەكى ءىنىسى دە بار.
سوت وتىرىستارى سوتتالۋشىنىڭ قاتىسۋىنسىز ءوتتى، ويتكەنى ول وسى ۋاقىت بويى پسيحياتريالىق كلينيكادا بولدى. ساراپشى-پسيحولوگ اۋرۋ بەلگىلەرى تۋىستارىنا بايقالماۋى مۇمكىن ەكەنىن، الايدا مەكتەپ پسيحولوگى ولارعا نازار اۋدارا الاتىنىن اتاپ ءوتتى.
جابىرلەنۋشى بولعان ءجاسوسپىرىمنىڭ اجەسى سوتتا بۇرىن نەمەرەسىنەن ەرەكشە ەشتەڭە بايقاماعانىن ايتتى. «نەمەرەم جاقسى، ءارقاشان ماعان كومەكتەسەتىن، كىشىلەرىمەن وينايتىن، مەن ول ءۇشىن قاتتى ۋايىمدايمىن. وعان ەشقانداي شاعىم تۇسكەن جوق. سول ءتۇنى نە بولعانىن بىلمەيمىن»، — دەپ ونىڭ ءسوزىن باسىلىم كەلتىرەدى.
سوت ءجاسوسپىرىمدى كىسى ءولتىرۋ جانە كىسى ولتىرۋگە وقتالۋدا كىنالى دەپ تانىدى، الايدا پسيحيكالىق اۋرۋىنا بايلانىستى ونى قىلمىستىق جاۋاپكەرشىلىكتەن بوساتتى. ماجبۇرلەپ ەمدەۋ شاراسى رەتىندە پسيحياتريالىق ستاسيوناردا ەمدەۋ تاعايىندالدى.
بۇعان دەيىن اقمولا وبلىسىنىڭ سوتى ارشالى اۋدانىنىڭ تۇرعىنىنا قاتىستى وسىنداي شەشىم شىعارعان بولاتىن، ول ءوز وتباسىن ءولتىردى دەپ ايىپتالعان.