اقتوبەدە مەملەكەتتىك باعدارلامامەن سالىنعان ءۇش كوپقاباتتى ءۇيدىڭ تۇرعىندارى دابىل قاعىپ وتىر: ۇيلەرى جارىلىپ، كورشىلەر ءبىرىن-بىرى كورىپ قالعان. بۇل تۋرالى infohub.kz سايتى حابارلايدى.
اقتوبەدە مەملەكەتتىك باعدارلاما اياسىندا سالىنعان ءۇش جاڭا توعىزقاباتتى ءۇيدىڭ تۇرعىندارى شۇعىل تۇردە كوشىرۋدى تالاپ ەتىپ وتىر. قالا تۇرعىندارىنىڭ ايتۋىنشا، نەبارى ەكى جىل ىشىندە عيماراتتار جارىقشاقتارعا تولعان. قابىرعالاردا ساڭىلاۋلار پايدا بولىپ، ءارتۇرلى پاتەرلەردىڭ تۇرعىندارى ءبىرىن-بىرى كورىپ قالعان. جوعارعى قاباتتاردان باستالعان جارىقشاقتاردىڭ ءبىرى ءقازىردىڭ وزىندە ەڭ تومەنگى قاباتقا دەيىن جەتكەن. تۇرعىندار قابىرعالار توتەپ بەرە الماي قالادى دەپ قاۋىپتەنىپ، ءۇش ءۇيدىڭ بارلىعىن كوشىرۋدى تالاپ ەتىپ وتىر.
«ءبىز شىن مانىندە اۆاريالىق جاعدايدا ءومىر ءسۇرىپ جاتىرمىز. مۇندا مۇگەدەكتەر، قارت ادامدار، بالالار، كوپبالالى وتباسىلار كوپ. ءبىز كۇن سايىن قورقىنىشپەن ءومىر سۇرگىمىز كەلمەيدى، ەرتەڭ ويانامىز با، ءتىرى قالامىز با دەپ ويلاعىمىز كەلمەيدى»، — دەيدى اقتوبە تۇرعىنى ايگۇل كاجەنوۆا.
ءۇش توعىزقاباتتى ۇيدە 200-دەن استام وتباسى تۇرادى. پاتەرلەردى مۇندا كەزەكتە تۇرعاندار: مۇگەدەكتەر، جەتىمدەر جانە كوپبالالى وتباسىلار العان.
«تۇندە ءارتۇرلى سىقىرلاعان دىبىستار ەستىلەدى. مەندە ءبارى جاقسى ەدى، ءبىر ساتتە ۇساق جارىقشاقتار پايدا بولدى. بۇل ومىرگە ءقاۋىپتى. ءبىز جاڭا باسپانا بەرۋدى تالاپ ەتەمىز. ساراپتاما كەلدى، بىزگە وسى ءۇيدى زەرتتەۋ 15-20 كۇنگە سوزىلاتىنىن ايتتى. ءبىراق تۇرعىنداردىڭ باسقا جەرگە كوشۋگە مۇمكىندىگى جوق»، — دەيدى اكتوبەلىك بوتاگوز شاكۋوۆا.
تۇرعىنداردىڭ شاعىمىنان كەيىن اكىمدىك تەكسەرۋ باستادى. «قازىرگى ۋاقىتتا توعىزىنشى جانە تەحنيكالىق قاباتتاردا جارىقشاق ەمەس، پانەلدىڭ ءوزى ءبولىنىپ تۇر، سوندىقتان ءبىز ساراپشىلاردى شاقىردىق. ساراپشىلاردىڭ قورىتىندىسىنان كەيىن ءتيىستى جوبالاۋ شەشىمى قابىلدانىپ، سوعان سايكەس جويىلادى. قازىرگى ۋاقىتتا ءۇيدىڭ قيراۋ ءقاۋپى جوق»، — دەدى اقتوبە قالاسى اكىمدىگى قۇرىلىس ءبولىمىنىڭ باسشىسى باۋىرجان ءجانتۇرين.