اقتوبە وبلىسىندا قولدانبالى مەديسينالىق زەرتتەۋلەرگە 1،8 ملرد تەڭگەدەن استام قارجى باعىتتالدى. باتىس قازاقستان مەديسينا ۋنيۆەرسيتەتىنىڭ عالىمدارى دەنساۋلىق ساقتاۋدىڭ وزەكتى ماسەلەلەرىن شەشۋگە ارنالعان التى ءىرى جوبا بويىنشا جۇمىس جۇرگىزىپ جاتىر، دەپ حابارلايدى infohub.kz سايتى.
اتالعان جوبالاردىڭ تورتەۋى گرانتتىق، ەكەۋى باعدارلامالىق-نىسانالى عىلىمي جوبالار. ماسەلەن، ماماندار ونكولوگيالىق اۋرۋلاردى ەرتە انىقتاۋ ادىستەرىن ازىرلەپ، اسقازان وبىرىنىڭ اعىمىن بولجاۋ بويىنشا زەرتتەۋلەر جۇرگىزۋدە، رادياسيانىڭ اعزاعا اسەرىن زەردەلەپ، جاسوسپىرىمدەر ءسۋيسيدىنىڭ الدىن الۋ جولدارىن ىزدەستىرۋدە.
جاڭا زەرتتەۋلەردىڭ باستى ماقساتى — تەوريامەن شەكتەلمەي، عالىمداردىڭ ازىرلەمەلەرىن اۋرۋحانالار مەن ەمحانالارعا ەنگىزىپ، اۋىر اۋرۋلاردى ۋاقتىلى انىقتاۋ جانە ەكولوگيالىق تاۋەكەلدەردى باعالاۋ.
اقتوبە وبلىسى اكىمدىگىنىڭ مالىمەتىنشە، وڭىردە عىلىم جونىندەگى كەڭەس تە قۇرىلعان. ول عىلىمي قاۋىمداستىق، مەملەكەتتىك ورگاندار جانە وندىرىستىك كاسىپورىندار اراسىنداعى ءوزارا ءىس-قيمىلدى نىعايتۋمەن اينالىسادى.
بۇعان دەيىن دەنساۋلىق ساقتاۋ مينيسترلىگى الەۋمەتتىك جەلىلەردە رەسپۋبليكانىڭ اۋىلدىق مەديسيناسىندا بىرنەشە جىلدا قانداي وزگەرىستەر بولعانىن، قانداي ءىرى مەديسينالىق نىساندار سالىنعانىن جانە قانداي جۇمىستار ءالى جالعاسىپ جاتقانىن حابارلاعان بولاتىن.
ماسەلەن، 2019 جىلدان بەرى ەلدە 1،2 مىڭنان استام دەنساۋلىق ساقتاۋ نىسانى پايدا بولدى. ولاردىڭ ىشىندەگى ىرىلەرى — استاناداعى ۇلتتىق عىلىمي ونكولوگيالىق ورتالىق جانە 200 توسەكتىك ۇلتتىق جەدەل مەديسينالىق ۇيلەستىرۋ ورتالىعى، سونداي-اق الماتىداعى 350 توسەكتىك ۇلتتىق جۇقپالى اۋرۋلار عىلىمي ورتالىعى. ءقازىر قۇنى 108 ملرد تەڭگە بولاتىن تاعى 51 مەديسينالىق نىساننىڭ قۇرىلىسى ءجۇرىپ جاتىر. ولاردىڭ قاتارىندا كوپبەيىندى اۋرۋحانالار مەن جاڭا ەمحانالار بار.