اقتوبە وبلىسىنداعى ءۇشقۇدىق اۋىلىندا اۋىز سۋعا قاتىستى داۋ تۋىندادى. جەرگىلىكتى تۇرعىندار سۋدىڭ ساپاسىنا شاعىمدانىپ، سالىنىپ جاتقان ەت كومبيناتى قوسىمشا قۇدىقتارعا قوسىلعاننان كەيىن سۋ مۇلدەم جەتپەي قالۋى مۇمكىن دەپ قاۋىپتەنۋدە، دەپ حابارلايدى infohub.kz.
اۋىل تۇرعىندارى Astana TV ارناسىنا ايتقانداي، ەلدى مەكەندە ءبىر جارىم مىڭ ادامعا نەبارى ءۇش قۇدىقتان كەلەدى، ونىڭ بىرەۋى كوپتەن بەرى جۇمىس ىستەمەيدى. قالعان ەكى سۋ كوزى دە كۇمان تۋدىرادى. ادامدار سۋدىڭ ۇزىلىسپەن بەرىلەتىنىنە جانە ساپاسىنىڭ ناشارلىعىنا شاعىمدانادى.
«قىسىم وتە ءالسىز، سۋدىڭ ساپاسى تۋرالى ايتپاي-اق قويايىن! بۇل سۋ ەمەس، لاس بالشىق. كەيدە ەلەكتر قۋاتى ءوشىپ، سۋ بەرۋ دە توقتايدى. سوسىن قوسقاندا، بۇل سۋ ەمەس، كىر. ونى پايدالانۋ مۇمكىن ەمەس!»، – دەدى ءۇشقۇدىق اۋىلىنىڭ تۇرعىنى باتىر ەسەنجانوۆ.
ەندى بار پروبلەماعا جاڭاسى قوسىلدى. اۋىلدىڭ جانىندا ەت كومبيناتى سالىنىپ جاتىر. ال كاسىپورىن سول قۇدىققا قوسىلماق. اۋىل تۇرعىندارى ءوندىرىس كوپ سۋ تۇتىنا باستاسا، سۋدىڭ وزدەرىنە جەتپەي قالۋىنان قورقادى.
«قۇدىقتاردا سۋ جوق، قۇدىقتان ىشۋگە بولمايدى. ءتىپتى مالعا دا بەرمەيمىز. ەندى تاعى ەت كومبيناتى ءبىزدىڭ قۇدىقتارعا قوسىلعىسى كەلەدى. وزىمىزگە ارەڭ جەتىپ جاتىر! ءبىز ەت كومبيناتىنىڭ وزىنە قارسى ەمەسپىز، اۋىل سۋىنىڭ ەت كومبيناتىنىڭ قاجەتىنە كەتۋىنە قارسىمىز. وزدەرىنە جەكە قۇدىق قازدىرىپ، سونى پايدالانسىن»، – دەدى ءۇشقۇدىق اۋىلىنىڭ تۇرعىنى قاليجان ىزباعامبەتوۆ.
جەرگىلىكتى اكىمدىكتە كاسىپورىننىڭ اۋىلدىق سۋ كوزىنە قوسىلاتىنىن راستادى. الايدا، شەنەۋنىكتەردىڭ ايتۋىنشا، قۇدىقتاعى سۋ وندىرىستە تەك ىشۋگە عانا پايدالانىلادى. ءۇشقۇدىق ءۇشىن قوسىمشا سۋ كوزدەرىن ىزدەۋ ازىرگە ناتيجە بەرمەي وتىر.
«ءۇشقۇدىق بويىنشا بارلاۋ جۇمىستارى جۇرگىزىلۋدە. ەكى جىلدان بەرى سۋ قورىن تابا الماي جاتىرمىز. ال ەت كومبيناتىنا كەلسەك، ولارعا تەك اۋىز سۋدى پايدالانۋعا رۇقسات ەتىلگەن. ال تەحنيكالىق سۋ الۋ ءۇشىن، ويتكەنى ولار تاۋلىگىنە 100 توننادان استام سۋ پايدالانادى، جوبادا وزدەرىنىڭ جەكە قۇدىعىن بۇرعىلاۋ قاراستىرىلعان»، – دەپ سەندىردى ءۇشقۇدىق اۋىلدىق وكرۋگىنىڭ اكىمى بەرىك اقداۋلەتوۆ.
ءبىراق اۋىل تۇرعىندارىن مۇنداي تۇسىنىكتەمەلەر ءالى تولىق سەندىرمەيدى. ادامدار جاڭا ءوندىرىس ىسكە قوسىلعاننان كەيىن سۋدىڭ بارلىعىنا جەتەتىنىنە سەنىمدى بولعىسى كەلەدى.