اقتوبە تۇرعىندارى مەملەكەتتىك ساتىپ الۋدان تابىس تابۋعا ۋادە ەتىلگەن ۇسىنىسقا سەنىپ، 100 ملن تەڭگەدەن استام اقشاسىنان ايىرىلدى. ولارعا ينۆەستيسيالىق سحەمانى تەندەر مەكتەبىندە وقىعاننان كەيىن ۇسىنعان، دەپ حابارلايدى infohub.kz سايتى.
زارداپ شەككەندەردىڭ ايتۋىنشا، اۋەلى ولاردى مەملەكەتتىك ساتىپ الۋعا قاتىسۋعا جانە تەندەرلەردى ۇتىپ الۋ جولدارىنا ۇيرەتكەن. كەيىن وقۋشىلارعا مەكتەپتىڭ باسقا تۇلەكتەرى العان تاپسىرىستاردى ورىنداۋعا اقشا سالۋ ۇسىنىلعان.
ۇيىمداستىرۋشىلار، زارداپ شەككەندەردىڭ سوزىنشە، مۇنى جاڭادان باستاعان جەتكىزۋشىلەرگە قاجەتتى تاۋارلاردى ساتىپ الۋعا قاراجات ءاردايىم جەتپەيتىندىگىمەن تۇسىندىرگەن. ينۆەستورلارعا لوتتى تولەۋدى ۇسىنىپ، ونىڭ ورنىنا بىرنەشە اي ىشىندە سىياقى تولەۋگە ۋادە بەرگەن.
«باستاپقىدا شارت – ءبىز وقۋشى بولۋىمىز كەرەك. تەك وقۋشىلار عانا ينۆەستيسيا سالا الادى. ول مۇنىڭ ءبارىن Instagram-دا كورسەتەدى، ونىڭ اۋديتورياسى وتە ۇلكەن. وسىلايشا اقشا تابۋعا بولاتىنىن كورسەتەدى: ياعني ينۆەستيسيا تارتاسىڭ، اقشا بەرەسىڭ، ءوزىڭ ەشتەڭە ىستەمەيسىڭ. باسقا وقۋشى سول ارقىلى يگىلىك ءۇشىن جۇمىس ىستەيدى، ال سەن ۇستىنەن سىياقى الاسىڭ»، – دەدى ايمان شۋريەۆا.
ۋادەلەرگە سەنگەن اقتوبەلىكتەر ءىرى سومالاردى تاپسىرعان. الايدا زارداپ شەككەندەردىڭ تۇجىرىمىنشا، ولار نە ۋادە ەتىلگەن تابىستى، نە سالعان قاراجاتىن قايتارىپ الا الماعان. ولاردىڭ ەسەبى بويىنشا، جالپى شىعىن 100 ملن تەڭگەدەن اسقان.
پوليسياعا جەتى ادام ارىزدانعان. كۇدىكتى ءۇيقاماققا جىبەرىلگەن، الايدا زارداپ شەككەندەر ونى قاماۋعا الۋدى تالاپ ەتۋدە. ولار ەر ادامنىڭ اقشا تارتۋدى جالعاستىرىپ، قىلمىستىق ىسكە قاتىسۋشىلارعا ىقپال ەتۋى مۇمكىن دەپ قاۋىپتەنەدى.
«قالانىڭ جەتى تۇرعىنى 33 جاستاعى جەرگىلىكتى تۇرعىنعا قاتىستى شارا قولدانۋ تۋرالى ارىزبەن جۇگىندى. ول ينۆەستيسيالىق قىزمەت جۇرگىزۋ سىلتاۋىمەن الداۋ جولىمەن ولاردىڭ اقشالاي قاراجاتىن يەمدەنگەن. وسى فاكتى بويىنشا قىلمىستىق ءىس تىركەلدى»، – دەدى اقتوبە وبلىسى پوليسيا دەپارتامەنتىندە.
ءىس بويىنشا سوتقا دەيىنگى تەرگەۋ جۇرگىزىلۋدە. پوليسيا وزگە مالىمەتتەردى ازىرگە جاريالاعان جوق.