اقتوبە تۇرعىندارى جىل سايىنعى ماسا-شىبىنداردىڭ شابۋىلىنا تاعى دا تاپ بولدى: جاندىكتەر توپ-توبىمەن ۇشىپ، قالا تۇرعىندارى بەتتەرىن جانە كوزدەرىن جابۋعا ءماجبۇر، دەپ حابارلايدى infohub.kz سايتى.
قالا تۇرعىندارىنىڭ ايتۋىنشا، اقتوبە كوشەلەرىندە ماسا-شىبىنداردىڭ ۇلكەن شوعىرى ادامداردى قورشاپ الىپ، كوزگە، مۇرىنعا، قۇلاققا جانە اۋىزعا كىرۋگە تىرىسادى. قالا تۇرعىندارى ماسكا مەن كوزىلدىرىكپەن قورعانۋعا ءماجبۇر. كەيبىرەۋلەر ۇيدەن سيرەك شىعۋعا تىرىسادى، ال جاقىن دۇكەنگە بارۋ ناعىز سىناققا اينالدى. اسىرەسە قورعانىسسىز كوشەگە شىققاندارعا قيىن. جاندىكتەردى اشىق جانە اق ءتۇستى كيىمدەر دە تارتادى.
«ءيا، ءيا، اسىرەسە اعاش كوپ جەردە. ءبىراق ولاردىڭ نەدەن تارالعانىن بىلمەيمىن. وتە جاعىمسىز. كوزگە، مۇرىنعا، اۋىزعا كىرەدى»، — دەيدى ءىلياس ەسمۋرات.
بۇل جاعدايدىڭ اقتوبە ءۇشىن جاڭالىق ەمەستىگى تاڭعالدىرادى. ماسا-شىبىندار كەستە بويىنشا دەرلىك — جىل سايىن قىركۇيەكتە پايدا بولادى. ءبىراق ولاردىڭ مۇنشاما كوپ مولشەردە قايدان كەلەتىنىن ماماندار دا تولىق تۇسىندىرە المايدى. سونىمەن قاتار، جاندىكتەرمەن كۇرەسۋ ءۇشىن جىل سايىن ارنايى بريگادالار شىعادى. اۋماقتار وڭدەلىپ، پرەپاراتتار شاشىراتىلادى. الايدا ماسا-شىبىندار بۇل پروسەدۋرالاردان مۇلدە قورىقپايتىن سياقتى.
«كەشەدەن بەرى قالادا ماسا-شىبىندارعا قارسى اۋماقتاردى وڭدەۋ جۇرگىزىلىپ جاتىر. مەردىگەر ۇيىم جۇمىستى كەزەڭ-كەزەڭىمەن اتقارۋدا. جاندىكتەرمەن كۇرەسۋ ءۇشىن ارنايى سەرتيفيكاتتالعان قۇرالدار قولدانىلادى. ولاردىڭ كوبەيۋى كۇرت جىلىنۋعا بايلانىستى بولۋى مۇمكىن»، — دەپ ءتۇسىندىردى اقتوبە قالاسى الماتى اۋدانى اكىمدىگى اپپاراتىنىڭ تكش ءبولىمىنىڭ باس مامانى جاديگەر بالتاباي.
وتكەن جىلدارى ماماندار شابۋىلدى جوعارى ىلعالدىلىقپەن بايلانىستىرعان، مول جاڭبىردان كەيىن جانە كۇرت جىلىنۋدان كەيىن جاندىكتەردىڭ كوبەيۋى ءۇشىن قولايلى جاعداي تۋادى دەيتىن. ءبىراق بيىلعى كۇز بۇل نۇسقاعا ونشا سايكەس كەلمەيدى. جازدىڭ سوڭىندا جاڭبىر از بولدى، الايدا ماسا-شىبىندار ءبارىبىر پايدا بولدى. اكىمدىكتە وڭدەۋ جۇرگىزىلىپ، بارلىق مۇمكىن شارالار قولدانىلىپ جاتقانىن ايتادى. ال قالا تۇرعىندارىنا شىدامدى بولۋعا كەڭەس بەرەدى. ويتكەنى ءبىر سەنىمدى ءادىس بار: سۋىقتىڭ ءتۇسۋىن كۇتۋ. سۋىق تۇسكەندە ماسا-شىبىندار وزدىگىنەن جوعالادى. كەلەسى قىركۇيەككە دەيىن بولماۋى مۇمكىن.
دەرەككوز: كتك. بۇعان دەيىن سۋ باسقان قوبدا تۇرعىندارىن شىبىن-ماسالاردىڭ قاپتاعانى حابارلانعان بولاتىن.