اقتوبەدە سابيروۆتار ەرلى-زايىپتىلارى 27 جىل بويى ۇلى رۋسلاننىڭ تاعدىرىن انىقتاۋعا تىرىسىپ كەلەدى. ول 1999 جىلى كوكتەمدە جوعالىپ كەتكەن بولاتىن. كوپ جىلعى ىزدەۋلەرگە قاراماستان، ونىڭ قايدا ەكەنى ءالى بەلگىسىز، دەپ حابارلايدى infohub.kz سايتى.
رۋسلان سابيروۆ 1999 جىلى 22 ناۋرىزدا جوعالىپ كەتتى. ول كەزدە ونىڭ جاسى 30-دا ەدى. ەر ادام ۇيلەنگەن بولاتىن، جەكە كافەسى بولعان جانە بولاشاققا جوسپار قۇرىپ جۇرگەن.
جوعالعان ادامنىڭ اناسى الماش سابيروۆانىڭ ايتۋىنشا، جوعالعان كۇنى ول جۇبايىمەن بىرگە اۋىرىپ جاتقان تۋىسىنا بارعان. ۇيدە رۋسلان مەن ونىڭ ەكى قارىنداسى قالعان. « قىزىم شايعا ءتاتتى الۋ ءۇشىن بازارعا بارۋىن ءوتىندى. سودان بەرى ونى كورمەدىك»،— دەدى ايەل.
ۇلى جوعالعاننان كەيىن وتباسى پوليسياعا جۇگىنىپ، ءوز بەتىنشە ىزدەۋ جۇمىستارىن باستادى. اتا-انا قازاقستاننىڭ ءار وڭىرىنە بارىپ، كەز كەلگەن اقپاراتتى تەكسەرىپ، ەڭ بولماسا ءبىر ءىز تابۋعا تىرىستى. جاۋاپ ىزدەۋ بارىسىندا ولار ءتىپتى ەكستراسەنسكە جۇگىندى، ول رۋسلاننىڭ ءتىرى ەكەنىن ايتقان.
27 جىل وتسە دە، ىزدەستىرۋ ءىسى ءالى جابىلماعان. «اقتوبە وبلىسى پوليسيا دەپارتامەنتى 1999 جىلى حابارسىز كەتكەن، 1969 جىلى تۋعان سابيروۆ رۋسلان شامشادينۋلىنىڭ قايدا ەكەنىن انىقتاۋ ءۇشىن جەدەل-ىزدەستىرۋ ءىس-شارالارىن جۇرگىزىپ جاتىر. قازىرگى ۋاقىتتا ونىڭ ورنالاسقان جەرى بەلگىسىز»،— دەدى پوليسيا دەپارتامەنتى ءباسپاسوز قىزمەتىنىڭ جەتەكشىسى ەربولات سارقۇلوۆ.
2026 جىلدىڭ باسىنان بەرى اقتوبە وبلىسىندا ادامداردىڭ جوعالۋى تۋرالى 900-گە جۋىق ءوتىنىش تۇسكەن. ىزدەستىرىلگەندەردىڭ كوپشىلىگى تابىلعان، الايدا ءۇش ادامدى ىزدەۋ جالعاسۋدا. رۋسلاننىڭ اتا-اناسى ءالى دە ۇلىنىڭ ءتىرى ەكەنىنە جانە ءبىر كۇنى ۇيىنە ورالاتىنىنا سەنەدى.