الاكول كولىندە ۇرلەمەلى قايىق ىستەن شىعىپ، التى ادام، ونىڭ ىشىندە ءتورت بالا، ءقاۋىپتى جاعدايدا قالدى. بۇل تۋرالى infohub.kz حابارلادى.
اباي وبلىسى توتەنشە جاعدايلار دەپارتامەنتىنىڭ جەدەل-قۇتقارۋ جاساعىنا كومەك تۋرالى حابار كەلىپ ءتۇستى. ماقانشى اۋىلى ماڭىنداعى ارالتوبە ارالىندا دەمالىپ جۇرگەن ادامدار جاعاعا ءوز بەتىمەن شىعا الماعانى ايتىلدى.
«قۇتقارۋشىلار ىزدەۋگە شىقتى. ادامدار بار قايىقتى جاعادان شامامەن 11 شاقىرىم قاشىقتىقتا تاپتى. بورتتا التى ادام – ەكى ەرەسەك جانە ءتورت بالا بولعان. تجم قىزمەتكەرلەرى بارلىق دەمالىسشىلاردى امان-ەسەن ەۆاكۋاسيالاپ، جاعاعا جەتكىزدى. باقىتىمىزعا وراي، ەشكىمگە مەديسينالىق كومەك قاجەت بولمادى»، – دەدى تجم-دە.
تجم ماماندارى سۋعا شىعار الدىندا قايىق پەن جابدىقتىڭ جارامدىلىعىن تەكسەرۋدى، اۋا رايىن ەسكەرۋدى جانە بايلانىس قۇرالدارى مەن قۇتقارۋ كەۋدەشەلەرىنسىز الىسقا جۇزبەۋدى ەسكەرتتى.
بۇعان دەيىن جەتىسۋ وبلىسىنداعى الاكولدە وتباسىلىق دەمالىس كەزىندە بولعان ەكى قايعىلى وقيعا حابارلانعان بولاتىن. ءبىرىنشى جاعدايدا كولدە ەكى گيدروسيكل سوقتىعىسىپ، سالدارىنان ءبىر ادام قازا تاۋىپ، تاعى بىرەۋى جارالانعان. ەكىنشى وقيعادا 70 جاستاعى ايەل كەرى جىلجىپ بارا جاتقان پارومنىڭ استىنا ءتۇسىپ، ەكى اياعىنان ايىرىلعان.