قازاقستان باس پروكۋراتۋراسى ازاماتتاردى ينتەرنەت-الاياقتىقتىڭ جاڭا سحەماسى تۋرالى ەسكەرتتى: قىلمىسكەرلەر وزدەرىن eGov قىزمەتىنىڭ قىزمەتكەرلەرى رەتىندە تانىستىرىپ، قوڭىراۋ شالىپ ءجۇر. سوڭعى ءبىر ايدىڭ ىشىندە وسىنداي 30-عا جۋىق وقيعا تىركەلگەن، دەپ حابارلايدى infohub.kz سايتى.
قاداعالاۋ ورگانىنىڭ دەرەگىنشە، قوڭىراۋ كەزىندە الاياقتار ادامعا ونىڭ اتىنا ەلەكتروندىق سيفرلىق قولتاڭبا جاسالىپ جاتقانىن نە وزگە دە ارەكەتتەر جۇرگىزىلىپ جاتقانىن ايتادى. كەيىن اڭگىمەگە سىبايلاستارى قوسىلىپ، زاڭسىز كرەديت راسىمدەلۋىنىڭ الدىن الۋ سىلتاۋىمەن زارداپ شەككەندەردى وزدەرى كورسەتكەن شوتتارعا اقشا اۋدارۋعا كوندىرەدى.
باس پروكۋراتۋرا ناقتى مىسال كەلتىردى. تاراز تۇرعىنىنا ءوزىن «eGov» قىزمەتكەرى دەپ تانىستىرعان بەيتانىس ادام قوڭىراۋ شالىپ، ونىڭ اتىنا ەسق شىعارىلعانىن حابارلاعان. كەيىن ونىمەن WhatsApp ارقىلى باسقا ادامدار بايلانىسىپ، ونىڭ اتىنا جەتى بانكتە كرەديت راسىمدەلگەنىن مالىمدەگەن. الاياقتاردىڭ ايلاسىنا الدانعان ايەل ءۇشىنشى تۇلعالاردىڭ شوتتارىنا 2 ملن تەڭگەدەن استام اقشا اۋدارعان. وسى فاكتى بويىنشا سوتقا دەيىنگى تەرگەۋ جۇرگىزىلىپ جاتىر.
باس پروكۋراتۋرا قازاقستاندىقتاردى ساق بولۋعا شاقىرادى. «مەملەكەتتىك ورگاندار مەن سەرۆيستەردىڭ قىزمەتكەرلەرى تەلەفون ارقىلى اقشا اۋدارۋدى، كرەديت راسىمدەۋدى نە قاراجاتتى «ءقاۋىپسىز شوتتارعا» اۋدارۋدى تالاپ ەتپەيدى. بەيتانىس ادامدارعا SMS-كودتاردى، قۇپياسوزدەردى، بانك كارتالارىنىڭ دەرەكتەرى مەن ەسق-نى حابارلاماڭىز، بەيتانىس ادامداردىڭ نۇسقاۋىمەن اقشا اۋدارماڭىز. كۇدىكتى قوڭىراۋ تۇسكەن جاعدايدا اڭگىمەنى توقتاتىپ، ءتيىستى مەملەكەتتىك ورگانعا نەمەسە بانككە رەسمي بايلانىس ارنالارى ارقىلى ءوزىڭىز حابارلاسىڭىز»، — دەدى قاداعالاۋ ورگانىندا.