قازاقستاندا الاياقتار مەملەكەتتىك ورگاندارعا قارجى مونيتورينگى اگەنتتىگىنىڭ اتىنان جالعان رەسمي حاتتار جىبەرىپ جۇرگەن جاعدايلار تىركەلدى. جاڭا الاياقتىق سحەماسى تۋرالى ۆەدومستۆونىڭ ءوزى ەسكەرتتى، دەپ حابارلايدى infohub.kz سايتى.
قارجى مونيتورينگى اگەنتتىگىنىڭ تۇسىندىرۋىنشە، مەملەكەتتىك ورگانعا ارنالعان مۇنداي حاتتاردا قىلمىسكەرلەر تەكسەرۋ جۇرگىزىلىپ جاتقانىن سىلتاۋراتىپ، ازامات تۋرالى مالىمەتتى — ونىڭ مىنەزدەمەسىن جانە باسقا دا اقپاراتتى سۇراتادى.
«بۇعان دەيىن الاياقتار وسىعان ۇقساس سحەمانى قولدانعان: جالعان حاتتاردى جىبەرگەن سوڭ ولار ازاماتتارعا تەلەفون نەمەسە مەسسەندجەرلەر ارقىلى حابارلاسىپ، وزدەرىن قما قىزمەتكەرى رەتىندە تانىستىرىپ، ءتۇرلى سىلتاۋمەن دەربەس جانە بانكتىك دەرەكتەرىن الۋعا نە اقشا تالاپ ەتۋگە تىرىسقان»، — دەدى اگەنتتىكتە.
قما اگەنتتىكتىڭ رەسمي حاتتارى تەك بەلگىلەنگەن تارتىپپەن جىبەرىلەتىنىن ەسكە سالدى. ۆەدومستۆو قىزمەتكەرلەرى تەلەفون ارقىلى بانك شوتتارىنىڭ دەرەكتەرىن بەرۋدى تالاپ ەتپەيدى جانە اقشا اۋدارۋدى سۇرامايدى. لوگوتيپى، ءمورى نەمەسە قولى بار دەگەن جەلەۋمەن قۇجاتتارعا سەنۋگە بولمايدى، ال كۇماندى حات كەلگەن جاعدايدا ونىڭ ءتۇپنۇسقالىعىن اگەنتتىكتىڭ رەسمي ارنالارى ارقىلى تەكسەرۋ قاجەت.
«بەيتانىس ادامدارعا دەربەس جانە بانكتىك دەرەكتەرىڭىزدى بەرمەڭىز جانە ولاردىڭ نۇسقاۋىمەن اقشا اۋدارماڭىز»، — دەپ ۇندەدى اگەنتتىكتە قازاقستاندىقتارعا.
كۇمان تۋىنداعان جاعدايدا ازاماتتاردى قما Call-ورتالىعىنا 1458 ءنومىرى ارقىلى نەمەسە كەزەكشى بولىمگە +7 (7172) 70-84-79 تەلەفونى ارقىلى حابارلاسۋعا شاقىرادى.