پاۆلودار وبلىسىندا اليمەنت بويىنشا 279 بورىشكەر ويىن شوتىن تولىقتىرىپ، ستاۆكا جاساي العان. ولاردىڭ جالپى جۇمساعان سوماسى 600 ملن تەڭگەدەن استى. بۇل تۋرالى infohub.kz سايتى وبلىس پروكۋراتۋراسىنا سىلتەمە جاساپ حابارلايدى.
سونىمەن قاتار، بورىشكەرلەر شوتتاردان 415 ملن تەڭگە اقشا شىعارعان. قۇمار ويىندارعا قاتىسقانداردىڭ ىشىندە 97 ادام اليمەنت تولەمەيتىن قاساقانا بورىشكەرلەر بولىپ تابىلادى.
«قازاقستان رەسپۋبليكاسىنىڭ „قۇمار ويىن بيزنەسى تۋرالى“ زاڭىنىڭ تالاپتارىن بۇزا وتىرىپ، اليمەنت بويىنشا 279 بورىشكەر ءوز ويىن شوتتارىن ەش كەدەرگىسىز تولىقتىرىپ، قۇمار ويىندارعا قاتىسقان»، — دەدى پروكۋراتۋرادا.
تەكسەرۋ قورىتىندىسى بويىنشا ۆەدومستۆو قۇمار ويىن بيزنەسى مەن لوتەرەيانى رەتتەۋ كوميتەتىنە پروكۋرورلىق قاداعالاۋ اكتىسىن ەنگىزدى.
وسىدان كەيىن بۋكمەكەرلىك كەڭسەلەر ءبىرىڭعاي ستاۆكالار مەن تولەمدەردى ەسەپكە الۋ جۇيەسىنە قوسىلا باستادى. بۇل جۇيە كليەنتتەردى بورىشكەرلەر ءتىزىلىمى بويىنشا اۆتوماتتى تۇردە تەكسەرەدى جانە اتقارۋشىلىق قۇجاتتار بويىنشا ورىندالماعان مىندەتتەمەلەرى بار ادامداردىڭ قۇمار ويىندارعا قول جەتكىزۋىن شەكتەيدى.
قازىرگى ۋاقىتتا جەتى بۋكمەكەرلىك كەڭسە ينتەگراسيانى اياقتادى، تاعى ون وپەراتور ءتيىستى كەلىسىمدەرگە قول قويدى.
پروكۋراتۋرادا اتاپ وتكەندەي، قابىلدانعان شارالار بۋكمەكەرلىك نارىققا مەملەكەتتىك باقىلاۋدى كۇشەيتۋگە، بورىشكەرلەردىڭ قۇمار ويىندارعا قول جەتكىزۋىن شەكتەۋگە جانە اليمەنتتەردى ءوندىرىپ الۋ تيىمدىلىگىن ارتتىرۋعا مۇمكىندىك بەرەدى.