الماتىدا مەگاپوليستە سالىنىپ جاتقان زاماناۋي ستاديوننىڭ بەينەجازباسى تانىستىرىلدى. بۇعان دەيىن قالا تۇرعىندارىنا سپورت نىسانىنىڭ ماكەتى كورسەتىلگەن ەدى، ەندى ونىڭ كەلبەتى ديناميكادا كورسەتىلدى، دەپ حابارلايدى infohub.kz.
الماتى دامۋ ورتالىعى ءوزىنىڭ Instagram پاراقشاسىندا جاڭا ستاديوننىڭ قانداي بولاتىنىن كورسەتەتىن بەينەنى جاريالادى. بولجام بويىنشا، ۆيزۋاليزاسيا جاساندى ينتەللەكت كومەگىمەن جاسالعان.
«بۇگىن — قۇرىلىس الاڭى، ەرتەڭ — 45 مىڭ جانكۇيەرگە ارنالعان فۋتبول ستاديونى. ارەنا ۋەفا-نىڭ ءتورتىنشى ساناتىنىڭ تالاپتارىنا ساي سالىنىپ، حالىقارالىق ماچتاردى قابىلدايتىن بولادى»، — دەلىنگەن بەينەجازبانىڭ سيپاتتاماسىندا.
ەسكە سالايىق، 2025 جىلدىڭ تامىز ايىندا الماتىدا حالىقارالىق دەڭگەيدەگى زاماناۋي ستاديون سالۋ جوسپارى بەلگىلى بولعان ەدى. سول كەزدە بيلىك ورتالىق ستاديوننىڭ تاعدىرى تۋرالى دا ايتقان بولاتىن. سول جىلدىڭ جەلتوقسانىندا ارەنا 35 مىڭ ورىنعا ەسەپتەلەتىنى حابارلانىپ، نىساننىڭ ماكەتى جاريالانعان ەدى.
الايدا جاقىندا الماتى اكىمدىگى ۋەفا ستاندارتتارىنا ساي سالىنىپ جاتقان ستاديون 35 مىڭ ەمەس، 45 مىڭ كورەرمەنگە ارنالاتىنىن جانە ونىڭ سىرتقى كەلبەتى دە وزگەرگەنىن ناقتىلادى.