الماتىدا اباتتاندىرۋ ەرەجەلەرىنىڭ ساقتالۋىن باقىلاۋ كۇشەيتىلدى. جىلدىڭ العاشقى التى ايىندا ەرەجە بۇزعانى ءۇشىن 111،9 ملن تەڭگەدەن استام ايىپپۇل سالىندى، دەپ حابارلايدى infohub.kz.
كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىنىڭ مالىمەتىنشە، جىل باسىنان بەرى زاڭدى تۇلعالار 8 972 اباتتاندىرۋ پاسپورتىن رەسىمدەپ، جوسپارلانعان كورسەتكىشتەردەن اسىپ تۇسكەن. «اباتتاندىرۋ پاسپورتى ىرگەلەس اۋماقتى كۇتىپ-ۇستاۋعا جاۋاپكەرشىلىكتى بەكىتۋدى راستايدى»، — دەپ ءتۇسىندىردى ۆەدومستۆودا.
العاشقى التى ايدا ماماندار 5 مىڭعا جۋىق اۋىزشا ەسكەرتۋ جاساپ، اقبتك-نىڭ 505-بابى بويىنشا 9 679 اكىمشىلىك ماتەريال رەسىمدەدى. سالىنعان ايىپپۇلداردىڭ جالپى سوماسى 111،9 ملن تەڭگەنى قۇرادى.
قالا اكىمىنىڭ تاپسىرماسى بويىنشا پاسپورتتاندىرۋ ناۋقانى قايتا جانداندىرىلعاننان كەيىن تاعى 672 اباتتاندىرۋ پاسپورتى رەسىمدەلدى. وسى كەزەڭدە 547 اكىمشىلىك ماتەريال جاسالىپ، ايىپپۇل سوماسى 12،7 ملن تەڭگەدەن استى.
ۆەدومستۆو مۇنداي شارالار نىسان يەلەرىنىڭ ىرگەلەس اۋماقتاردى كۇتىپ-ۇستاۋعا جانە قالادا ءتارتىپ ساقتاۋعا جاۋاپكەرشىلىگىن ارتتىرۋعا باعىتتالعانىن اتاپ ءوتتى.