11 قىركۇيەكتەن باستاپ الماتى-بىشكەك تاسجولىنىڭ ءبىر بولىگىندە ءىرى گاباريتتى جانە اۋىر سالماقتى كولىكتەرگە ۋاقىتشا شەكتەۋ ەنگىزىلەدى، دەپ حابارلايدى infohub.kz سايتى.
«كازاۆتوجول» ۇك» اق ماماندارى رەسپۋبليكالىق ماڭىزى بار الماتى-بىشكەك اۆتوجولىنىڭ 25-شاقىرىمىندا، قاسكەلەڭ قالاسىنىڭ ماڭىندا كولىك ايرىعىنىڭ ءمونوليتتى ارالىق قۇرىلىمىن ورناتۋ جۇمىستارى جۇرگىزىلەتىنىن ەسكەرتتى. وسىعان بايلانىستى 11 قىركۇيەكتەن باستاپ اتالعان ۋچاسكەدە بيىكتىگى 4،5 مەتردەن جانە ەنى 8 مەتردەن اساتىن كولىك قۇرالدارىنىڭ قوزعالىسىنا ۋاقىتشا شەكتەۋ ەنگىزىلەدى.
شەكتەۋ قۇرىلىس جۇمىستارى تولىق اياقتالعانعا دەيىن، ياعني 2026 جىلدىڭ سوڭىنا دەيىن جالعاسادى. بۇل رەتتە ول جەڭىل جانە جولاۋشىلار كولىكتەرىنە، سونداي-اق بەلگىلەنگەن گاباريتتىك پارامەترلەردەن اسپايتىن جۇك كولىكتەرىنە قولدانىلمايدى.
ءىرى گاباريتتى جانە اۋىر سالماقتى كولىك جۇرگىزۋشىلەرىنە باعىتتى الدىن الا جوسپارلاپ، بالامالى جولداردى پايدالانۋ ۇسىنىلادى. جول قوزعالىسىنا قاتىسۋشىلاردان ەنگىزىلىپ جاتقان شەكتەۋلەردى تۇسىنىستىكپەن قابىلداۋلارىن سۇرايدى.