كەشە كەشكە الماتىدا BMW كولىگى بۇرىلىس كەزىندە اۋدارىلىپ، جول-كولىك وقيعاسى بولدى. وقيعا ءال-فارابي داڭعىلىندا، ۆواد-قا اپاراتىن توننەلدىڭ الدىنداعى ايرىقتا بولعان، دەپ حابارلايدى infohub.kz سايتى.
Almaty_typical Instagram-پاراقشاسىندا جاريالانعان اقپاراتقا سايكەس، جۇرگىزۋشى ايرىقتان شىعىپ بارا جاتىپ، قۋاتتى كولىكتى باسقارا الماعان. BMW جوعارى جىلدامدىقپەن بورديۋرگە سوعىلىپ، سودان كەيىن بەتون قورشاۋدى قۇلاتىپ وتكەن. قاتتى سوققىدان كولىك توبەسىمەن اۋدارىلىپ، كۋاگەرلەردىڭ ايتۋىنشا، جول بويىمەن شامامەن 10 مەتر سىرعاناعان. ايتا كەتەرلىگى، قۇنى شامامەن 40 ملن تەڭگە بولاتىن كولىك اپات بولعان كۇنى عانا ساتىپ الىنعان.
NUR.KZ ءتىلشىسى الماتى قالالىق پوليسيا دەپارتامەنتىنىڭ ءباسپاسوز قىزمەتىنە ساۋال جولدادى. وندا وقيعا مەدەۋ اۋدانىندا ساعات 21:30-دا بولعانىن حابارلادى. پوليسيا مالىمەتىنشە، BMW جۇرگىزۋشىسى ءال-فارابي داڭعىلىمەن شىعىس باعىتتا كەلە جاتىپ، لۋگانسكي كوشەسىنە بۇرىلۋ كەزىندە توننەلدەن شىعا بەرىپ، رۋلگە يە بولا الماي، بورديۋرگە سوققان.
سالدارىنان كولىك اۋدارىلعان. باقىتىمىزعا وراي، ەشكىم زارداپ شەككەن جوق. وقيعانىڭ ءمان-جايىن مەدەۋ اۋداندىق پوليسيا باسقارماسىنىڭ قىزمەتكەرلەرى انىقتاپ جاتىر.