الماتىدا كۋاگەرلەر كولىكتەردى جاپپاي ەۆاكۋاسيالاۋ ءساتىن بەينەگە ءتۇسىرىپ الدى: رىسقۇلبەكوۆ كوشەسىندە، قازاق باس ساۋلەت-قۇرىلىس اكادەمياسىنىڭ (قازبسقا) جانىندا ءبىر ۋاقىتتا 10-نان استام ەۆاكۋاتور جۇمىس ىستەگەن، دەپ حابارلايدى infohub.kz سايتى.
بەينەروليكتى almatynews_kaz Instagram پاراقشاسى جاريالادى. كۋاگەردىڭ ايتۋىنشا، ءتۇسىرىلىم كەزىندە جول بويىندا 20-دان استام كولىك تۇرعان.
الماتى قالالىق پوليسيا دەپارتامەنتى NUR.KZ تىلشىسىنە ەشقانداي وقيعا بولماعانىن ءتۇسىندىردى. ءسوز كولىك قۇرالدارىن توقتاتۋ جانە تۇراق ەرەجەلەرىن بۇزۋشىلىقتاردى انىقتاۋعا باعىتتالعان تۇراقتى تۇردە جۇرگىزىلەتىن رەيدتىك ءىس-شارالار تۋرالى بولىپ وتىر.
«رەيدتەردىڭ نەگىزگى ماقساتى — جول قوزعالىسى قاۋىپسىزدىگىن قامتاماسىز ەتۋ جانە باسقا قوزعالىس قاتىسۋشىلارىنا كەدەرگى كەلتىرەتىن جاعدايلاردىڭ الدىن الۋ»، — دەپ اتاپ ءوتتى پوليسيادا.
اكىمشىلىك پوليسيا باسقارماسىنىڭ دەرەگىنشە، جىل باسىنان بەرى توقتاتۋ نەمەسە تۇراق ەرەجەلەرىن بۇزعانى ءۇشىن 35 مىڭنان استام قۇقىق بۇزۋشى اكىمشىلىك جاۋاپكەرشىلىككە تارتىلعان، 10 مىڭنان استام كولىك قۇرالى ارنايى تۇراققا قويىلعان.
«پوليسيا جۇرگىزۋشىلەردى جول قوزعالىسى ەرەجەلەرىنىڭ تالاپتارىن ساقتاۋعا، جول بەلگىلەرى مەن تاڭبالاۋعا نازار اۋدارۋعا، سونداي-اق تەك رۇقسات ەتىلگەن تۇراق ورىندارىن پايدالانۋعا شاقىرادى»، — دەدى الماتى تۇرعىندارى مەن قوناقتارىنا قالالىق پد.