الماتىدا وڭتۇستىك كورەي ستاندارتتارى بويىنشا جۇمىس ىستەيتىن زاماناۋي كوپبەيىندى اۋرۋحانا سالىنادى. اۋقىمدى جوبانى سەۋلگە مەملەكەتتىك ساپارى بارىسىندا قازاقستان پرەزيدەنتى قاسىم-جومارت توقاەۆقا تانىستىردى، دەپ حابارلايدى infohub.kz سايتى.
جوبانىڭ باستاماشىلارى — «شين-لاين» كومپانيالار توبىنىڭ باسشىسى اندرەي شين جانە Hyundae Hospital باس ديرەكتورى كيم بۋ سوپ. ولار مەملەكەت باسشىسىنا بولاشاق مەديسينالىق ورتالىقتىڭ تۇجىرىمداماسىن ۇسىندى.
ولاردىڭ ايتۋىنشا، الماتىدا جوعارى تەحنولوگيالىق مەديسينالىق ورتالىق قۇرۋ جوسپارلانۋدا. وندا يننوۆاسيالىق ەمدەۋ-دياگنوستيكالىق جابدىقتار ەنگىزىلىپ، ىشكى پروسەستەر وڭتۇستىك كورەيانىڭ جەتەكشى كلينيكالارىنىڭ ۇلگىسىمەن بەيىمدەلەدى، سونداي-اق قازاقستاندىق دارىگەرلەر Hyundae Hospital بازاسىندا ۇزدىكسىز وقىپ، تاعىلىمدامادان وتەدى.
«كورەيادا الەمدەگى ەڭ ۇزدىك دەنساۋلىق ساقتاۋ جۇيەلەرىنىڭ ءبىرى بار، ءبىزدىڭ مىندەتىمىز — وسى تەحنولوگيالار مەن ستاندارتتاردى وزىمىزگە، الماتىعا اكەلۋ»، — دەپ اتاپ ءوتتى كەزدەسۋدە اندرەي شين.
ءوز كەزەگىندە كيم بۋ سوپ كلينيكا كورەيدىڭ قاتاڭ ساپا جانە قاۋىپسىزدىك ستاندارتتارى بويىنشا جۇمىس ىستەيتىنىن ايتتى. سونىمەن قاتار ول جاڭا ەمدەۋ-دياگنوستيكالىق تەحنولوگيالاردى ەنگىزۋ نيەتىن ءبىلدىرىپ، قازاقستاندىق مەديكتەردى ۇزدىكسىز وقىتۋدى ۇيىمداستىرۋعا ۋادە بەردى.
ەسكە سالايىق، ساپار اياسىندا قازاقستاندىق «شين-لاين» ج ش س جانە كورەيدىڭ Chung-Ang University Healthcare System Hyundae Hospital كلينيكاسى ءوزارا تۇسىنىستىك تۋرالى مەموراندۋمعا قول قويدى.
بۇعان دەيىن «كۋرسيۆ» الماتىدا زاماناۋي ونكوورتالىق سالىناتىنىن جازعان. ول روبوتوتەحنيكاسى بار وپەراسيالىق بلوكپەن، مولەكۋلالىق-گەنەتيكالىق زەرتحانامەن جانە پرەپاراتتاردى دايىنداۋدىڭ اۆتوماتتاندىرىلعان جۇيەسىمەن جابدىقتالادى. بۇل قاتەرلى ىسىكتى ەرتە ساتىدا انىقتاۋعا مۇمكىندىك بەرەدى.