الماتىدا 4-13 قىركۇيەك ارالىعىندا ورتالىق جانە تالدى كوشەلەرىنىڭ قاكيمبەك سالىقوۆ كوشەسىنەن جاڭگىر حان كوشەسىنە دەيىنگى بولىگىندە كولىك قوزعالىسى شەكتەلەدى. بۇل تۋرالى infohub.kz سايتى حابارلايدى.
«الاتاۋ جارىق كومپانياسى» اق-نىڭ تۇسىندىرۋىنشە، جۇمىستاردى جۇرگىزۋ قاجەتتىلىگى №2353 جانە №2363 220 كۆ اۋە جەلىلەرىنىڭ زاقىمدانۋىنا بايلانىستى تۋىنداپ وتىر. سونىڭ سالدارىنان الماتى قالاسى مەن الماتى اگلومەراسياسىن سەنىمدى ەلەكترمەن جابدىقتاۋدى قامتاماسىز ەتەتىن 220 كۆ جەلىسىنىڭ ساقينالىق سحەماسى بۇزىلعان.
ەلەكترمەن جابدىقتاۋدىڭ سەنىمدى سحەماسىن قالپىنا كەلتىرۋ ءۇشىن كومپانيا ماماندارىنا ورتالىق جانە تالدى كوشەلەرى اۋدانىنداعى زاقىمدالعان كابەلدىك ۋچاسكەدە اۆاريالىق-قالپىنا كەلتىرۋ جۇمىستارىن قىسقا مەرزىمدە ورىنداۋ قاجەت.
جۇمىستار بارلىق قاجەتتى قاۋىپسىزدىك شارالارىن ساقتاي وتىرىپ، تاۋلىك بويى جۇرگىزىلەتىن بولادى. قالا تۇرعىندارى مەن قوناقتارىنان جول مارشرۋتتارىن الدىن الا جوسپارلاپ، قاجەتتى جۇمىستاردى جۇرگىزۋگە بايلانىستى ۋاقىتشا قولايسىزدىقتاردى تۇسىنىستىكپەن قابىلداۋلارىن سۇرايدى.