الماتى وبلىسىنىڭ يرگەلى اۋىلىندا وقۋ جىلى جوندەۋ جۇمىستارى اياقتالماعان مەكتەپتە باستالدى: وقۋشىلار پارتادا وتىردى، قاسىندا ارلەۋ جۇمىستارى ءجۇرىپ جاتتى، اۋادا شاڭ مەن بوياۋ ءيىسى اڭقىدى. سەگىز وقۋشى ءوزىن ناشار سەزىنىپ، ولارعا جەدەل جاردەم شاقىرىلدى، كوبى جوتەلگەن، باس اۋرۋى مەن لوقسۋعا شاعىمدانعان، دەپ حابارلايدى infohub.kz سايتى.
اتا-انالاردىڭ ايتۋىنشا، مەكتەپتىڭ ەسكى كورپۋسىنداعى جوندەۋ جۇمىستارى شىلدەنىڭ سوڭىندا باستالعان. ساباقتار باستالدى، الايدا جوندەۋدى اياقتاۋ مۇمكىن بولمادى. اتا-انالاردىڭ سوزىنشە، بوياۋ ءيىسى مەن شاڭنان وقۋشىلاردا اللەرگيالىق رەاكسيا باستالعان.
ءجاميلا يمانبەكوۆانىڭ بالاسى ءتورتىنشى سىنىپتا وقيدى. ساباق باستالعاننان كەيىن بىرنەشە كۇن وتكەندە ول جوتەلە باستاعان. بۇرىن وقۋشىعا استما دياگنوزى قويىلعان، سوندىقتان اناسى دەرەۋ تالداۋ تاپسىرىپ، كەيبىر كورسەتكىشتەردىڭ نورمادان ايتارلىقتاي جوعارى ەكەنىن انىقتاعان.
«مەنىڭ بالامنىڭ شاڭعا اللەرگياسى بار. وسىدان تۇنشىعىپ جۇرگەن ەكەن. بىلگەنىمدە، دەرەۋ دارىگەرلەرگە جۇگىردىم. دارىگەرلەر راستادى، سەندەردە اللەرگيالىق جوتەل، بالا تۇنشىعادى، ەنتىگۋ بار دەدى. قازىرگى تاڭدا ول اپپاراتپەن تىنىس الىپ جاتىر»، — دەدى ايەل.
باسقا وقۋشىلار دا ناشار سەزىنگەنىن ايتقان. اتا-انالاردىڭ ايتۋىنشا، ءبىر كۇنى سەگىز وقۋشىعا بىردەن جەدەل جاردەم شاقىرىلعان. سونىمەن قاتار، ءقازىر عيماراتتا ورىن جەتىسپەگەندىكتەن بالالار ءۇش اۋىسىمدا وقيدى، ال ساباق ۇزاقتىعى 30 مينۋتقا قىسقارتىلعان.
«ول باسى اينالاتىنىن، لوقسيتىنىن، باسى اۋىراتىنىن، جالپى السىزدىك بار ەكەنىن ايتتى. بالا ءالى كۇنگە دەيىن اۋرۋحانادا جاتىر»، — دەدى اتا-انا ايمان توقۇشەۆا.
اتا-انالار ەسكى كورپۋستاعى ساباقتار كەشەگە دەيىن جالعاسقانىن ايتادى. ال وتباسىلار دابىل قاعىپ، قۇزىرلى ورگانداردى شاقىرا باستاعاندا، عيمارات جابىلدى. الايدا مەكتەپ ديرەكتورى بۇنىمەن كەلىسپەيدى. ونىڭ ايتۋىنشا، كورپۋس قىركۇيەكتىڭ باسىنان بەرى ساباققا پايدالانىلمايدى، ال 10 جانە 11-سىنىپ وقۋشىلارى ونلاين وقۋعا كوشىرىلگەن.
«11 قىركۇيەكتە سەگىز وقۋشى ءوزىن ناشار سەزىندى، سودان كەيىن جەدەل جاردەم شاقىرىلدى. كەشە، 14 قىركۇيەكتە، جەدەل جاردەم مەكتەپكە تاعى كەلدى. بۇگىن سول بالالاردىڭ جەتەۋى ساباققا كەلدى، جاعدايلارى قاناعاتتانارلىق. اتا-انالار اۋرۋحاناعا جاتقىزۋدان وزدەرى باس تارتتى»، — دەدى ءوز نۇسقاسىن ل.ن. تولستوي اتىنداعى مەكتەپتىڭ ديرەكتورى گۇلجاحان كەنىزباەۆا.
مەكتەپ ديرەكتورى جوندەۋ وسى ايدىڭ سوڭىنا دەيىن اياقتالاتىنىنا سەندىردى. قازان ايىندا وقۋشىلار قالىپتى وقۋ رەجيمىنە ورالا الادى.