جاڭا وقۋ جىلىنىڭ العاشقى كۇنى الماتى مەتروپوليتەنى جولاۋشىلار سانىنىڭ كۇرت وسۋىنە تاپ بولدى. تەك كۇننىڭ ءبىرىنشى جارتىسىندا مەترو شامامەن 40 مىڭ ادامدى تاسىمالدادى، دەپ حابارلايدى infohub.kz سايتى.
مەتروپوليتەن ءباسپاسوز قىزمەتىنىڭ مالىمەتىنشە، 1 قىركۇيەكتە ساعات 06:20-دان 14:00-گە دەيىن مەترو قىزمەتىن شامامەن 40 مىڭ جولاۋشى پايدالانعان. وقۋ جىلىنىڭ باستالۋىنا بايلانىستى ەلەكتروپويىزداردىڭ قوزعالىس كەستەسى تۇزەتىلدى: تاڭعى جانە كەشكى قاربالاس ۋاقىتتا پويىزدار اراسىنداعى ينتەرۆال 3 مينۋت 27 سەكۋندقا دەيىن قىسقارتىلدى.
ءباسپاسوز قىزمەتى جولاۋشىلارعا ىڭعايلى جانە ءقاۋىپسىز قىزمەت كورسەتۋدى قامتاماسىز ەتۋ ءۇشىن مەتروپوليتەن جولاۋشىلار اعىنىن باقىلاۋدى جالعاستىرىپ جاتقانىن اتاپ ءوتتى.
بۇعان دەيىن الماتى مەتروسىندا ادامداردىڭ كوپ بولعانى، سونداي-اق قالا تۇرعىندارى 1 قىركۇيەكتە ادەتتەن تىس بوس جولدارعا نازار اۋدارعانى حابارلانعان بولاتىن: كەپتەلىس دەڭگەيى 3-تەن 6 باللعا دەيىن بولدى.
ەسكە سالايىق، قارساڭىندا الماتى اكىمدىگى كومپانيالارعا قىركۇيەكتىڭ العاشقى كۇندەرىندە قىزمەتكەرلەردىڭ ءبىر بولىگىن قاشىقتان جۇمىسقا اۋىستىرۋدى ۇسىنىپ، ءوزى ۇلگى كورسەتكەن ەدى. جۇرگىزۋشىلەرگە دە جەكە كولىكتەن باس تارتىپ، قوعامدىق كولىكتى پايدالانۋعا كەڭەس بەرىلگەن.