جىل باسىنان بەرى نازاربايەۆ داڭعىلى، 120 جانە 124 مەكەنجايلارىندا ورنالاسقان 11 ويىن-ساۋىق مەكەمەسىنە قاتىستى پوليسياعا 167 شاقىرۋ ءتۇستى. ماڭايداعى ءۇي تۇرعىندارى شۋ مەن قوعامدىق ءتارتىپتىڭ بۇزىلۋىنا شاعىمدانۋدا. انىقتالعان دەرەكتەر بويىنشا پوليسەيلەر 257 اكىمشىلىك حاتتاما جاسادى. مەكەمە باسشىلارىنا بۇزۋشىلىقتاردى جويۋ تۋرالى ۇسىنىستار جولداندى. شارا قولدانباعانى نەمەسە جاۋاپ بەرمەگەنى ءۇشىن تاعى 11 حاتتاما جازىلدى، دەپ حابارلايدى infohub.kz سايتى.
«بۇل ۋچاسكە پوليسيانىڭ ەرەكشە باقىلاۋىندا. ءبىز تەك جاسالعان قۇقىق بۇزۋشىلىقتارعا عانا ەمەس، تۇرعىنداردىڭ وتىنىشتەرىنە دە جاۋاپ بەرەمىز. يەلەرى ءتۇسىنۋى كەرەك: ويىن-ساۋىق مەكەمەسىنىڭ جۇمىسىن ۇيىمداستىرۋ ىرگەلەس اۋماقتاعى تارتىپكە جاۋاپكەرشىلىكتى بىلدىرەدى»، — دەدى الماتى قالالىق پد قوعامدىق قاۋىپسىزدىك باسقارماسىنىڭ باستىعى تيمۋر نوعايبايەۆ.
پوليسيا وسى مەكەمەلەرگە قاتىستى پروفيلاكتيكالىق جانە باقىلاۋ ءىس-شارالارىن جالعاستىرادى.
بۇعان دەيىن الماتىداعى مەدەۋ اۋدانى، نازاربايەۆ كوشەسىندە شوقان ءۋاليحانوۆ بەينەلەنگەن جاساندى ينتەللەكتپەن جاسالعان باننەر پايدا بولعان ەدى. Threads الەۋمەتتىك جەلىسىندەگى جازبانىڭ استىنداعى پىكىرلەردە پايدالانۋشىلار ماسەلە ماتىندە عانا ەمەس، سۋرەتتىڭ وزىندە ەكەنىن اتاپ ءوتتى. ءۋاليحانوۆتىڭ پورترەتىندە تاريحي شىندىققا سايكەس كەلمەيتىن باس كيىم بەينەلەنگەن.