الماتىدا بىردەن بەس كولىك قاتىسقان جاپپاي جول اپاتى بولدى. وقيعاعا ۇرلانعان شەتەلدىك كولىكتى تىزگىندەگەن جۇرگىزۋشى كۇدىكتى بولىپ وتىر. بۇل تۋرالى قالالىق پوليسياعا سىلتەمە جاساپ، NUR.KZ ءتىلشىسى حابارلادى، دەپ جازادى infohub.kz سايتى.
الماتى قالالىق پوليسيا دەپارتامەنتىنىڭ ءباسپاسوز قىزمەتى ناقتىلاعانداي، جول-كولىك وقيعاسى بۇگىن، 15 قىركۇيەكتە ساعات 12:00 شاماسىندا ۇلكەن الماتى كانالىنىڭ بويىندا بولعان.
«الدىن الا دەرەكتەرگە سايكەس، Nissan كولىگىنىڭ جۇرگىزۋشىسى ۇلكەن الماتى كانالىنىڭ بويىمەن شىعىس باعىتتا كەلە جاتىپ، سارباستاۋ كوشەسىنەن باتىسقا قاراي ءرۋلدى باسقارا الماي، الدىندا كەلە جاتقان Mitsubishi كولىگىمەن سوقتىعىسقان. سوقتىعىسۋ سالدارىنان ينەرسيامەن تاعى بىرنەشە كولىك سوقتىعىسقان»، — دەدى پوليسيادا.
Nissan جانە Mitsubishi كولىكتەرىنىڭ جۇرگىزۋشىلەرى قاجەتتى كومەك كورسەتۋ ءۇشىن مەديسينالىق مەكەمەگە جەتكىزىلگەنى بەلگىلى بولدى.
«تەكسەرۋ بارىسىندا Nissan كولىگىن جۇرگىزۋشى كورشىسىنەن زاڭسىز يەمدەنگەنى دە انىقتالدى. ۇرلىق فاكتىسى بويىنشا الاتاۋ اۋداندىق پوليسيا باسقارماسى قىلمىستىق ءىس قوزعادى. وقيعانىڭ ءمان-جايى انىقتالۋدا»، — دەپ قوستى الماتى پوليسيا دەپارتامەنتىندە.
سول ۋاقىتتا جەلىدە اپات ورنىنان كۋاگەرلەردىڭ تۇسىرگەن كادرلارى پايدا بولدى.